[Tlhingan-hol] mIl'oD veDDIr SuvwI': 'ay' 15 - pop 'oH ghob'e'

[Rohan Fenwick - QeS 'utlh]

If anyone's still reading after my lengthy absences, 'avtanDIl just buttered up roStevan and promised that he would go to every boundary of the Kol'vat Region to announce the joyous news of tIna'tIn's accession to the throne. Comments, criticism, and questions are as always most welcome.

'ay' 15: pop 'oH ghob'e'
----------
ghIq voDleH vaS 'el SuvwI' net chaw'; 'utlh vuv ghaH 'ej tlho'meH mu'mey jatlh: «'o 'utlh, chonaDqu'ta'mo' choquvqu'moHneS! DaH nuchevbogh 'IttaHghach ram'e' wovmoHjaj QI'tu', 'ej qablIj bel belqa'moHlu'pu'bogh vIlegh 'e' chaw'jaj.»
DeSDajDaq ghaH tlhap roStevan 'ej paw'chu'; tlhoS puqloDna'Daj rur 'avtanDIl. chaH rurbogh chang'eng'e' not tu'lu'pu' – Qorghbogh vay', vay' Qorghlu'pu'bogh joq. tagha' QamchoH SuvwI', 'ej mej. luchevlu'law'pu' chaH; 'avtanDIlvaD loQ SaQchoH valqu'bogh 'ej quvqu'bogh roStevan.
vaj mej 'avtanDIl, yItchu'bogh 'ej jaqchu'bogh SuvwI' yoH. cha'maH jaj lengtaH; pem law', ram law' je tay'moHchu'. not tIna'tIn'e', tIqDaj meQmoHtaHbogh be''e', Qubbe'choH; qo' bel ghaH tIna'tIn'e', mIp'a' wellu'bogh ghaH. Dat jaHDI', lopqu'taH Sep nuvpu'. luqIH 'ej lughom chuQun, 'ej nobmey wagh nobtaH. QIt lengbe'bej loD Qup'e', Dat paSbe'qu' jul rurbogh loD'e', nom lengtaHvIS. nuvpu' lubelqu'choHmoHlu'chu', luqIHDI' 'ej ghaHDaq SumchoHDI'.
wo' veH nuvpu' ghIjlaHchu'bogh veng HoS'e' che' 'avtanDIl; naghna' 'oH yergho'e', chenmoHlu'meH nagh'a' tIn lumutlhlu'ta'. veng loHmeH, qaStaHvIS wej jaj vengDaq ratlhtaH ghaH chon taghpa', 'ej ghojwI'Daj SermaDInvaD ngupDaj nob 'avtanDIl. nItebHa' toy'wI'vam'e' 'avtanDIl'e' je luQorghlu'pu'; 'avtanDIlvaD matlhchu'taH, 'avtanDIl toy'ruptaH. wej 'avtanDIl tIq meQmoHtaHbogh qul Sovbe'chu'; vaj DaH ghaHvaD 'avtanDIl jul, tIna'tIn, tulmoHbogh mu'mey 'ang 'avtanDIl.
jatlh ghaH: «HIQoy, SermaDIn, ngoDvammo' jItuH SoHvaD 'e' vI'angnIS. Hoch SojwIj DaSovchu'; 'oH Daqelchu'ta' 'ej 'oHmo' choqeSchu'ta'. 'ach muSaQqu'bogh ghu''e' wej DaSovchoHpu'! mubechqu'moHpu'bogh be'vo' DaH tIqwIj DuQtaH bel'a'. tIna'tInvaD muDuQtaH parmaqna'; SeparDu'wIj bIrDaq pubchoH tIqwIj 'Iw tuj; wej bepwIj vISo'pu'bogh vI'anglaHbe'pu'. 'ach DaH jItulchoHta' 'e' mura' be'vetlh, vaj jIbelchoH 'e' Dalegh. mujatlh tIna'tIn: ‹ngabta'bogh SuvwI' bopbogh De''e' yIghoj, ghIq choghoS, 'ej tIqlIj parmaq vIpupmoH. loDnalwI' Damoj SoH neH vIneH, latlh vIneHbe'qu'; tIqwIjDaq lav pochbogh Sor'a' 'oH SanwIj'e'.› jatlhpu'pa', tIqwIj baghlu'pu' 'ej vonlu'pu'; jatlhpu'DI', tIqwIj rachlu'pu' 'ej vorlu'pu'.»
----------
SKI: 'avtanDIl thanks roStevan for the commendation, goes to make the announcements as promised, and then returns to inform his pupil SermaDIn that he intends to depart to carry out the task that tIna'tIn has requested him to do.

QeS 'utlh
 		 	   		  
-------------- next part --------------
An HTML attachment was scrubbed...
URL: <http://stodi.digitalkingdom.org/pipermail/tlhingan-hol/attachments/20130106/e23a27fa/attachment-0001.html>