[Tlhingan-hol] vavwI' lut

[lojmIt tI'wI' nuv 'utlh]

qen tlhoy jIghoHmo' ‘ej tlhoyHa’ tlhIngan Hol vIlo’mo’, jIqeqmeH, vavwI’ lut vIjon.

cha’ loDnI’ cha’ be’nI’ je ghaj vavwI’. vaghvam’e’ vavwI’ qan law’ Hoch qan puS.

nenchoHDI’ vavwI’ qaS tera’ noH’a’ cha’DIch. bIQDuj’a’Daq ‘america’ SepjIjqa’ toy’choH vavwI’…

tlhoS jIvIt… loQ Qatlh DelmeH Qu’.

not bIQDuj’a’Daq toy’. bIQDuj’a’ lo’taHbogh QI’’e' toy’. puHDaq toy’.

toy’meH vavwI', ghojmeH chalDujHommey tI’. *Kingfisher* pong chalDujHomvam. roD rutlhmey Hutlh *Kingfisher*. bIQDaq SaqlaH. puHDaq SaqlaHbe’. ‘ach ghojmeH ‘orwI’pu', chalDujvam choHlu’. bIQDujHommey teqlu’ ‘ej rutlhmey chellu’.

qaStaHvIS QI’ DIS qaStaHvIS leSpoH pIj chuchchoH vavwI’. pIj chuchchoHchu’. ghaHvaD roD vumnISbe’DI’ chuchchoHchu’ neHchoH.

qeqtaHvIS QI’, cha’-rutlh-puH-DujHom lo’. DopDaq quS, rutlh wejDIch chellu’. pa’ ba’ vavwI’.

pa’ ba’taHvIS vavwI’, bong QI’ Saqghom bIQvo’-SaqmeH-HatlhDaq-ghoSlaHbogh-Duj’a’ He ngeQ vavwI’ DopquS. ‘uSDaj Qaw’. teqbe’, ‘ach DIr jeq Hom, ‘ej Hom ‘ay’ chIllu’. runchoH ‘uSvetlh.

qaStaHvIS wa’maH chorgh jar, vavwI’ ngaS *body cast*. qaStaHvIS cha’maH cha’ jar, QI’ ropyaHDaq ratlh. tlhabchoHDI’, pIj chuchchoHchu’. tlhoy chuchchu’taH. SIHlaHbe’ qIv. run wa’ ‘uS. yItlaH, ‘ach Qatlh yItmeH Qu’. qetlaHbe’bej.

pIj HomDu’ ngejlu’. ‘oy’chu’. pIj ‘IQ.

jIboghpa’ yatlhtaHvIS SoSwI’, chuchchu’taHvIS vavwI’, puHDuj ‘orHey ‘e’ tu’ yaS. qop. qaStaHvIS wejmaH jaj, bIghHa’ ratlh. pa’ HIq tlhutlhlaHbe’. tlhabDI’ HIq tlhutlhQo’. vaj jIboghDI’, not chuchchoH vavwI’.

wej DIS jIboghpu’DI’, vavwI’ Such tennuSwI’. chuchchoHchu’ tennuSwI’. tennuSwI’ juHDaq tennuSwI qeng vavwI’. puHDujHom lo’. cheghtaHvIS, DujquS bIngDaq HIq bal Qoy vavwI’. puHDuj mev. tlhutlh. chuchchoH. not HIq tlhutlhqa’Qo’.

chuchtaHvIS, chuSchu’ ‘ej Qobba’taH. vaj, jInenpa’, reH jIQuchvIp, jI’IQvIp, jIchuSvIp, jIreHvIp… pIj jISo’’egh. yabDaq peghchoH Hoch. jItaQchu’taH, ‘ach jItamtaHmo’ tu’ pagh.

Hut DIS jIboghpu’DI’, Hegh vavwI’. jIQuchvIpbe’, ‘ach jIQuchpu’be’mo’ jIQuchmeH Qu’ vIyajbe’. taD tIqwIj.

taDHa’pu’ tIqwIj, ‘ach poH nI’qu’ poQ. javmaH DIS jIboghpu’, ‘ej pIj jIQuch. loQ jItaQtaH, ‘ach pIj jIQuch.

mu’IQmoH vavwI’ yIn. mu’QuchlaHmoH vavwI’ Hegh. QuchlaHbe’ vavwI’, vaj HeghDI’ Dub DotlhDaj. wej muDub Hegh, vaj jIyIntaH.

lojmIt tI’wI’ nuv ‘utlh
Door Repair Guy, Retired Honorably