[Tlhingan-hol] tennuSnalwI' lut

[Rohan Fenwick]

ghItlhpu' lojmIt tI'wI' nuv, jatlh:
> Heghpu’ tennuSnalwI’.

jIQoS. bey vIjach.

jatlhtaH:
> Heghpu’DI’ lutDaj ‘ang puqloDDaj (lorloDwI’).> qaStaHvIS tera’ noH’a’ cha’DIch, tal qengmeH puHDuj lo’ QI’. puH
> Hotbe’bogh rutlhmey law’ ghaj puHDujvam. qogh’a’ vIHmoH
> rutlhmeyvam. puH ghegh ghoSmeH, qogh’a’vam lo’ puHDujvam.> “tank” vIDel vIneH. jIQap’a’?

bIQapchu'pu'. SIbI' Dujvetlh vIghovpu' jIH.

taH:
> wej puHDujvam qeng SaqmeH bIQDuj’e’ ‘orbogh tennuSnalwI’.
> SaqmeH bIQDujvam tIn law’ SaqmeH bIQDuj motlh tIn puS.
> QapmeH, wa’maH Soch beq poQ bIQDujvam.> vIraS yotDI’ ‘amerI’qa’ SepjIjQa’, bIQDujvam ‘or tennuSnalwI’.
> “Omaha Beach”Daq Saq. wej poHDuj HIj.

toH, {puHDuj} DaHechba'pu'. TARDISmey DaDelbe'ba'...

> HIjta’DI’, SaqHa’meH, tlhe’. bIQDaq jorwI’ ngeQ. vaj jor jorwI’,
> ‘ej ghor bIQDuj. SaltaHvIS bIQDuj botlh, ghIr ‘er’In megh’an je.
> cha’ ‘ay’ moj bIQDuj.> ghIrpa’ bIQDuj botlh, tennuSnalwI’ volchaH retlhDaq juS jorwI’’e’
> HIjta’bogh tal. talmeyvamvaD <<chorghmaH chorghmey>> ponglu’.
> DaH wej ‘aymey moj bIQDujvam. SIbI’ bIQ bIng pum megh’an botlh
> je. pa’, Hegh Hoch. ‘er’InDaq ghaHtaH tennuSnalwI’. pa’ yIntaH loS
> beq.
ratlhtaH qar'a' loS neH? puSqu'. Do'ba' tennuSnallI'.

> rIQqu’ tennuSnalwI’. QemjIq Suq nach Hom. QemjIqDaq QoghIjDaj
> leghlu’. DubDaj HomDu’ ghorlu’. vultaH.

'ach Do'qu'be'ba' je tennuSnallI'. qabbej 'oy'vetlh Segh 'ej pIj HeghmoH. yIntaHmo' Doj HoSDaj.

> bIQ ghorDaq ratlhmeH jan tuQ tennuSnalwI’. mongDaq tuQ. ghIgh’a’
> rur, ‘ach bIQ ghorDaq ratlhmeH janvam buy’moHmeH SIp chelnIS.
> SIrgh yuvHa’nIS. vaj tennuSnalwI’vaD SIrgh yuvHa' tennuSnalwI’
> ra’wI’, ‘ej bIQDaq tennuSnalwI’ HIj ra’wI’.> pa’, qaStaHvIS repmey law’, lommey law’ ‘ej lom ‘ay’mey law’ tlhej
> tennuSnalwI’. loSlaH neH.
{chIjwI' tIQ bom} vIqawmoHlu':

jImob, jImob, reH, reH jImob,
bIQ'a'Daq taH pagh qa'!
pagh qa' quv vupmoHchu'taH ghob,
mujoy'taHvIS bep'a'.

SIQmeH ghu'vetlh Qatlh law' HochHom Qatlh puS. vIyajlaHbe'qu'chu' jIH.

> Qappu’DI’ QI’ Qu’ ‘ej yoS SeHDI' QI’, bIQvo’ tennuSnalwI’ qenglu’,
> ‘ej ropyaHDaq ghoS.> not lutvam mujatlh tennuSnalwI’. reH QuchtaH. reH qIDtaH.

pIj ghu'meychaj ja'qa'Qo'qu' yIntaHbogh SuvwI'. vImerlu'be'. qorDu'wIj'e' tera' noH'a' wa'DIchvaD Suvlaw'pu' 'op tuqnIghwI', 'ach DISvam neH ''e vItu'pu'. yIntaHvIS chaH, not qunchaj Delqang 'ej Heghpu'DI' neH wanI'mey SIQpu'bogh vIghojpu' jIH.

> loD QaQ ghaHta’. pIj ‘oy’qu’law’, ‘ach not bep. reH vIvuvchu’.

'e' vIHonbe'qu'. loD quv ghaHlaw'. loQ 'oy'DI' SuvwI' bepbe'.

> Heghmo’, ghom qorDu’maj. pa’ HochvaD ghItlhwI’mey nob lorloDwI’.> qatlh?> QIj lorloDwI’. mIpbe’bej tennuSnalwI’. butlh ghaj. mIpwI’pu’ par.> malja’mey ghoSDI’ tennuSnalwI’, pIj ghItlhwI’mey nob malja’.
> malja’vaD qutlhba’, ‘ach tennuSnalwI’vaD, noblu’. wa’ ghItlhwI’
> tlhaplu’ ‘e’ pIH malja’, ‘ach roD Hoch ghItlhwI’mey tlhap
> tennuSnalwI’. buqmeyDaq, ghopDu’Daq tlhap, ‘ej monchu’.> bortaSHomDaj ‘oH. HuchDaj tlhap malja’, ‘ach ghItlhwI’meychaj
> tlhap tennuSnalwI’.
'opben vIttlhegh val jatlhpu' wa' jupwI':
 {DaDIlnISbe'chugh, cha' tItlhap} "if it's free, take two". :)

> toH, DaH, ghItlhwI’mey law’ vIghaj ‘ej pIj jImon ‘ej tennuSnalwI’ vIqawtaH.

quvba' ghaH, 'ej DaqawtaHmo' DaquvmoH je SoH.

QeS 'utlh
 		 	   		  
-------------- next part --------------
An HTML attachment was scrubbed...
URL: <http://mail.kli.org/pipermail/tlhingan-hol/attachments/20151202/cfe6e48d/attachment-0001.html>