[Tlhingan-hol] tennuSnalwI' lut

[Will Martin]

Heghpu’ tennuSnalwI’.

Heghpu’DI’ lutDaj ‘ang puqloDDaj (lorloDwI’).

qaStaHvIS tera’ noH’a’ cha’DIch, tal qengmeH puHDuj lo’ QI’. puH Hotbe’bogh rutlhmey law’ ghaj puHDujvam. qogh’a’ vIHmoH rutlhmeyvam. puH ghegh ghoSmeH, qogh’a’vam lo’ puHDujvam.

“tank” vIDel vIneH. jIQap’a’?

wej puHDujvam qeng SaqmeH bIQDuj’e’ ‘orbogh tennuSnalwI’. SaqmeH bIQDujvam tIn law’ SaqmeH bIQDuj motlh tIn puS. QapmeH, wa’maH Soch beq poQ bIQDujvam.

vIraS yotDI’ ‘amerI’qa’ SepjIjQa’, bIQDujvam ‘or tennuSnalwI’. “Omaha Beach”Daq Saq. wej poHDuj HIj. HIjta’DI’, SaqHa’meH, tlhe’. bIQDaq jorwI’ ngeQ. vaj jor jorwI’, ‘ej ghor bIQDuj. SaltaHvIS bIQDuj botlh, ghIr ‘er’In megh’an je. cha’ ‘ay’ moj bIQDuj.

ghIrpa’ bIQDuj botlh, tennuSnalwI’ volchaH retlhDaq juS jorwI’’e’ HIjta’bogh tal. talmeyvamvaD <<chorghmaH chorghmey>> ponglu’. DaH wej ‘aymey moj bIQDujvam. SIbI’ bIQ bIng pum megh’an botlh je. pa’, Hegh Hoch. ‘er’InDaq ghaHtaH tennuSnalwI’. pa’ yIntaH loS beq.

rIQqu’ tennuSnalwI’. QemjIq Suq nach Hom. QemjIqDaq QoghIjDaj leghlu’. DubDaj HomDu’ ghorlu’. vultaH.

bIQ ghorDaq ratlhmeH jan tuQ tennuSnalwI’. mongDaq tuQ. ghIgh’a’ rur, ‘ach bIQ ghorDaq ratlhmeH janvam buy’moHmeH SIp chelnIS. SIrgh yuvHa’nIS. vaj tennuSnalwI’vaD SIrgh yuvHa' tennuSnalwI’ ra’wI’, ‘ej bIQDaq tennuSnalwI’ HIj ra’wI’.

pa’, qaStaHvIS repmey law’, lommey law’ ‘ej lom ‘ay’mey law’ tlhej tennuSnalwI’. loSlaH neH.

Qappu’DI’ QI’ Qu’ ‘ej yoS SeHDI' QI’, bIQvo’ tennuSnalwI’ qenglu’, ‘ej ropyaHDaq ghoS.

not lutvam mujatlh tennuSnalwI’. reH QuchtaH. reH qIDtaH. loD QaQ ghaHta’. pIj ‘oy’qu’law’, ‘ach not bep. reH vIvuvchu’.

Heghmo’, ghom qorDu’maj. pa’ HochvaD ghItlhwI’mey nob lorloDwI’.

qatlh?

QIj lorloDwI’. mIpbe’bej tennuSnalwI’. butlh ghaj. mIpwI’pu’ par.

malja’mey ghoSDI’ tennuSnalwI’, pIj ghItlhwI’mey nob malja’. malja’vaD qutlhba’, ‘ach tennuSnalwI’vaD, noblu’. wa’ ghItlhwI’ tlhaplu’ ‘e’ pIH malja’, ‘ach roD Hoch ghItlhwI’mey tlhap tennuSnalwI’. buqmeyDaq, ghopDu’Daq tlhap, ‘ej monchu’.

bortaSHomDaj ‘oH. HuchDaj tlhap malja’, ‘ach ghItlhwI’meychaj tlhap tennuSnalwI’.

toH, DaH, ghItlhwI’mey law’ vIghaj ‘ej pIj jImon ‘ej tennuSnalwI’ vIqawtaH.

pItlh
lojmIt tI'wI'nuv



-------------- next part --------------
An HTML attachment was scrubbed...
URL: <http://mail.kli.org/pipermail/tlhingan-hol/attachments/20151201/d24d855f/attachment-0001.html>