[Tlhingan-hol] nuq bop bom: 'ay' cha'vatlh wej: toy'wI''a' QaQ
Qov
robyn at flyingstart.ca
Thu May 31 17:58:29 PDT 2012
Mahoun asked Qa'bar how it was that he was still alive, if he had
murdered the councillor's son.
203: toy'wI''a' QaQ
jatlh Qa'bar, "DaHeSbe'pu'mo'. *lotlhwI'*Daq 'urtaH Hung tamey
leHtaHbogh 'avwI''e' 'e' tu' qImyal. tamey choHlaw'ta'mo' 'urwI'
HeSmey So'laH. Do'Ha' yu'laHpa' qImyal, HoH'egh maghwI'. qama' lI'be'
SoHmo', toy'wI''a'wI' qamojmoH. bISay'moHlaH. juHwIj tI Da'IHmoHlaH.
bIbom 'e' luQoymeH muSuch nuv law'. Do'Ha' DIvI' rojmab wIqI'DI',
'anDorngan Darurmo' qapollaHbe'. 'anDorngan SoH 'e' luHarmo'
SuchwI'pu'wI', mab vIbIvlaw'[287]. vaj 'anDorngan qama'pu' nge'meH
pawDI' 'anDorngan Duj, ghomvetlhvaD qatlhejmoH. juH bopbogh De'
potlh'e' SovlaHmo' toywI''a', bImejpa' yablIjvo' poH naQ qIl tuQDoq
chamwI' 'e' vIra'."
jatlh Mahoun, "qatlh tlhIngan Hol vIlIjbe'pu'?"
jatlh Qa'bar, "QeD vISovbe'. wanI'mey'e' Daqawbe'moH tuQDoq. jaS Hol
polmo' QoghIj, Hol SIghbe'law' tuQDoq. ghaytan wejwa'mey, pIwmey je
DaghovlaH je."
tamtaH Mahoun, De' chu' qeltaHvIS. ghIq loQ HaghchoH. jatlh, "wej DIS
wanI'mey qIlta' tuQDoq 'ach wej DIS tlhIngan Soj QaQ qIlbe'pu'."
rotlhmoHwI'qoq QIjpu'. DaH Hujbe' je Mahoun Sov, Hol laH je 'ach
taQtaH Qa'bar lut. toy'wI''a' neHbe'choHDI' vay', roD HoH pagh ngev.
qatlh yInmeH Mahoun SuDpu' Qa'bar?
Duj choltaHmo' Du' Ha'DIbaHmey ghum HaSta. jatlh Qa'bar, "Duj
vISaqnISqa'. Sajolta'DI' nom vISaqta'. povbe' Daqvam." 'et ghoS.
bejchuq 'eSSIm Mahoun je. tlhaymey Hutlh Qa'bar yIvbeH'e' tuQtaHbogh
Mahoun. ghaH nIH DeS rIQbe' yachchoH 'eSSIm. 'IHmoH tlhIngan yIvbeH.
jatlh 'eSSIm, "bIpIv'a'?"
mon Mahoun 'ej 'eSSIm cholqu'. jatlh, "HIja'." DeSDajDaq bej'egh.
tlhupchoH. jatlh, "yuQwIjDaq HItlhej. De' lellu'DI' bISaH vIneH."
"DaH vIlel vIneH. naDev'e'," jatlh 'eSSIm. tlhup je. jatlh,
"Qa'barvaD neH QInvetlh ngeHlu'ta'. wItlhapchugh maH, tlhIngan yejquv
DevwI' QIn wInIHta'. maghwI' vIDa vIneHbe'. chaq tlhIngan SoHbe'mo'
DayajlaHbe'." matlhchu' 'eSSIm 'e' cha' neHqu'.
jatlh Mahoun, "chaq porghlIjDaq 'oHbe'mo' DayajlaHbe' SoH jay'!"
jatlh 'eSSIm, "Mahoun, qatlh bIbepqu'? DaSIQlaHba'. DaHjaj HomDu'lIj
vIghorlaw'pu'DI' bIQaltaH! DaH yeblIj 'oy' law' DIr SIjnISlu'bogh
'oy' puS. bIyoHqu'. yIghel neH. chaq SaHbe'." Qorwaghvo' SaqlI' Duj
'e' leghlaH 'eSSIm. tamchoH 'ej Mahoun Hotbe'choH, 'ach MahounvaD
qoy'taH mInDu'Daj.
cheghDI' Qa'bar, purqu' Mahoun. jatlh, "qaH ... De' DaSuqmeH DeSwIj
Dape'ta''a'?"
----
SKI: Essim persuades Mahoun to ask the councillor about the data in his arm.
----
[287] Even Klingon politicians have to be careful not be seen
retaining illegal aliens as domestic workers. :P
More information about the Tlhingan-hol
mailing list