[Tlhingan-hol] nuq bop bom: 'ay' wa'vatlh HutmaH Hut: qughwI' mach

[Qov]

'eSSIm met Councilmember Qa'bar of the Klingon High Council and he 
beamed her aboard his ship.

199: qughwI' mach

lugh Mahoun chIjwI'. naDev Saqpu' pIvlob chavlaHbogh Duj mach'e'. Doj 
Duj. jol rav lItHa' 'eSSIm. 'etDaq meH SeHlaw tu'lu'. 'o'Daq SoQtaH 
cha' lojmItmey. Duj botlhDaq vutpa', raS, De'wI', quSmey je lutu'lu'. 
Say' Duj qoD 'ej Dach 'avwI'pu', toy'wI'pu' je. jatlh 'eSSIm, "beq 
Daqembe'pu''a', joHwI'?"

jatlh Qa'bar, "rut peghmo' Qu', Sov pagh 'e' vImaS." nuq 'oH 
Qu'vetlh'e'? qatlh gharben cha' ghoSta' DevwI''e' 'ej qatlh 'eSSIm'e' 
qIH neH? ghelbe' 'eSSIm.

De'wI' HaSta legh 'eSSIm. Mahoun lu'oSbogh 'op mIlloghmey cha'taH. 
Sotlaw'vo' HochHom lutlhaplu'pu'. mIrmey tuQtaHbogh loD langqu' much 
wa' mIllogh. nuDmeH chol 'eSSIm. Qupqu' qama'. wa'Hu' nentay loppu' 
'e' HarlaH 'eSSIm. "HIja', Mahoun ghaH," jatlh DevwI'. "batlh vang." 
ghel neHqu' 'eSSIm 'ach Qa'bar patlhmo' tamtaH. ghonDoq lam nuDmeH 
'etlh qogh tuQHa'moH 'eSSIm. bIQmo' Sachpu' DIr Hap 'ej tlhoS qogh 
poSmoHlaHbe'. nuHmey Say'moHmeH DIr QaD poQ 'eSSIm 'ach tlhob 'e' 
ngIbe'. 'etlh roQ 'ej meHDaq tlhejchoH DevwI'.

SeHlawDaq ba'choH Qa'bar 'ej may'Duj rI'. jatlh, "yelwIyyItngan boSamta''a'?"

jatlh meH yaS, "ghobe'. tej neH luSamta'. ghaytan Heghpu' nov. lom nejlI'."

jatlh Qa'bar, "tej vIqIHpu'. wInejmeH DujwIj vIlo'." jatlhtaHvIS 
SaqHa' 'ej puvchoH Duj. jabbI'ID van Qa'bar 'ej 'eSSImvaD jatlh, 
"nuqDaq wInej 'e' Dachup?" bIttaH 'eSSIm 'e' tu' Qa'bar. QeHmo' 
SaghchoH DevwI' qab. jatlh, "vay' DaSov. Mahoun DaQIHpu''a' SoH, 'eSSIm?"

"HIja'! mutoDtaHvIS DeSDaj vIghorpu'mo' naghmey 'uchlaHbe'," jatlh 'eSSIm.

"vISov," jatlh Qa'bar. "may'DujvaD lutlIj ja'ta' nejwI' ghom bu'. nuq 
Dajatlhbe'pu'?"

'eSSIm yu'lI' tlhIngan yejquv DevwI'. wo' toy' 'eSSIm. loS ben 
boghpu'DI', SoSDajmo' paQDI'norgh potlh ghojpu': wo' potlh law' 
loDnal potlh puS. purqu' 'eSSIm 'ej DaHjaj wanI'mey ja'chu'. tlhogh 
'Ip neH nop. 'urmangHeyDaj QIjmeH jatlh 'eSSIm, "tlhIngan matlh jIH. 
chun Mahoun 'e' vI'Ip, joHwI'." Mahoun maghta'mo' joy''egh 'eSSIm 
'ach wo' potlh law' Hoch potlh puS.
----
SKI: Loyalty to the Klingon Empire and family experience defeats 
love, and Essim tells the councillor where Mahoun is.