[Tlhingan-hol] nuq bop bom: 'ay' wa'vatlh chorghmaH chorgh: potlh muD neH.
Qov
robyn at flyingstart.ca
Sun May 13 04:47:06 PDT 2012
Essim, a complete non-swimmer, has been thrown off a bridge into deep water.
188: potlh muD neH
tlheghHey Sam 'eSSIm ghop. 'uchqu' 'ej tlha'choH. tlhuHnISqu'mo'
tlhoS luH'eghlaHbe' 'ach tlhegh tlha'lI'. muD SIchta'. muD Qop rech
'ej tlhuHqa'.
ravHom botlh pIrmuSvo' HuS 'eSSIm tlhegh. Mahoun pong jach 'e' nID
'ach tlhovqu'mo' jatlhlaHbe'. leS 'eSSIm, tlhegh 'uchqu'taHvIS.
tlhuHtaH. ravHom Qarghmeymo' loQ ravHom yor leghlaH. Sor HapDaq,
'eSSIm DungDaq je QamtaH cha' loDpu'. tlhIngan chaH. QI' DaSmey
leghlaH 'eSSIm. nISwI' HIchmey QeqtaH. 'eSSImDaq Qeqbe'taH. nISwI'
DuSHommey lurgh lutlha' 'eSSIm mInDu'. ravHom 'e'rIn legh. pa' QamtaH
Mahoun. loDpu' bejtaH 'ej 'eSSIm yan mach 'uchtaH. mang mInDu'Daq QIn
QeqtaH. vaQ qabDaj 'ej qu' porghDaj. wan DeSDaj. 'etlhvetlh lo'laHbej
'e' HarlaH vay'. nuch ghaHbe'bej 'eSSIm parmaqqay. "nuH yIroQ,
Mahoun," jatlh wa' mang. Mahoun! chay' pongDaj luSov? DoH Mahoun 'ej
ravHom Qutlhbogh tlheghmey'e' pe'meH 'etlh Qachqu'. pov qech 'ach
Mahoun 'emDaq negh tu'lu' je. Mahoun 'uchchoH wa' loD 'ej 'etlh nge'
latlh. bIQtIqDaq 'etlh vo'.
QumwI' lel 'etlh vo'ta'bogh mang'e'. jatlh, "QuvmajDaq bIQtIqDaq
pumpu' cha' nuv. bIQtIq yIHotlh. tIjol!" nepta'! bong qaSpu' chach 'e' maq.
ravHomDaq loDpu' HIvmeH, tlhegh toSchoH 'eSSIm. bIQvo' porghDaj
luHta'DI', ghIrchoH tlhegh. tlhegh ngo' 'oH. ravHomDaq baghlu'be'pu'.
loQ lu'uchtaH neH Sor Hap 'ay'mey joj. 'eSSIm QutlhlaHbe'. bIQtIq
HeHDaq wewchoH Mahoun, 'uchbogh mang je, 'ach lujlaw'mo' jol,
wewbe'choH 'ej ratlhtaH. SuvchoH Mahoun. mang yeb Senqu' 'ej chop,
ghIq 'eSSIm paQDI'norgh lo'chu'. mangvo' nargh Mahoun 'ej latlhpu'
junmeH qet. pep'eghmeH tlhegh luHqa' 'eSSIm, 'ach ravHomvo' chev. yav
luSIchlaHbe' 'eSSIm qamDu'. ravHom luSIchlaHbe' 'eSSIm ghopDu'.
'eSSIm qengchoH bIQtIq. ghIrbe'meH Suvqu' 'eSSIm. lImchoH. bIQ
'uchbe'chu' nItlhDu'Daj. jach. voQbe'meH bIQ ghupnIS.
bIQtIq HeHvo' Supta' Mahoun. puvlaw'taHvIS tlhoS SaS porghDaj. bIQ
'elpu'DI' nachDaj, bIQDaq QalchoH 'ej ghIrbe'. 'eSSIm ghoSchu'lI'.
chay' ta'lI'? 'eSSIm Qutlhbe'chu' bIQ. SuvtaH 'eSSIm 'ach SachHa'taH
qo'Daj. muD neH buSchu'. QallaHbe'. leghlaHbe'. QublaHbe'. jatlhtaH
vay' 'ach potlhbe'. potlh muD neH.
---
SKI: Mahoun escapes his Klingon captors and dives into the river after Essim.
More information about the Tlhingan-hol
mailing list