[Tlhingan-hol] mIl'oD veDDIr SuvwI': 'ay''a' cha' - 8. loD Quch jIHbe'

[Rohan Fenwick - QeS 'utlh]

The 'ay''a'mey are divided as they appear in the original text, so the length is going to be variable. The first one was shortish; this one's a little longer. Here begins the second 'ay''a': mIl'oD veDDIr tuQbogh SuvwI' legh roStevan.

No warnings. Lots of crying though.

8. loD Quch jIHbe'

pay' bIQtIqHom HeHDaq loD lughovbe'bogh lulegh. HeHDaq ba'taH loD 'ej SaQtaH, wochbogh 'ej qIjbogh SarghDaj tlheghmey 'uchtaHvIS. SuvwI''a' ghaHlaw', Sub rurchu'. may'luchDaj, Sargh quSDaj, Sargh tlheghmeyDaj je vel bochtaHbogh Separmey law'. tlhoS mInDu'Daj DoqchoHmoHlaw'pu' 'Iw'e' nIjmoHbogh tIqDaj 'IQ. porghDajDaq cheSvel tIq tuQtaH[1], 'ej ghopDajDaq ghanjaq'a'[2] 'uchtaH; ghanjaq pI' law' loD DeS pI' puS. cheSvelDaj vel mIl'oD veDDIr ngup, 'ej mIvDaj vel je mIl'oD veDDIr 'ay'. SuvwI'vetlh lubejtaHvIS chaH, Quchbe'choH chaH 'ej qIDbe'choH. SaQtaH SuvwI', nachDaj joDmoHpu' ghaH; tIvmoHbogh wanI' 'oHbe'bej.

tIq 'IQ ghajlaw'bogh SuvwI'vaD jatlhmeH, wa' toy'wI''a'Daj ghoSmoH 'utlh. SuvwI' chol toy'wI''a', 'ach ghoSpu'DI', jatlh'eghchoHmoHlaHbe'qu' ghaH. jotHa'choH toy'wI''a'; loD HujvaD jatlh 'e' ngIlbe'. HoSchoHpa' tIqDaj, toy'wI''a'vaD 'ut loSmeH poH nI'. tagha' chol'eghmoHchu' 'ej pe'vIlHa'[3] jatlh'eghmoH: «Dura' roStevan 'utlh; DaghoS neH ghaH.»

'ach SaQtaH SuvwI', nachDaj joDmoHpu' ghaH; pagh Qoylaw' ghaH 'ej pa' ghaHtaH toy'wI''a''e' 'e' tlhojbe'law'. toy'wI''a' SoQHom 'Ijbe'law', negh beymey Qoybe'law', yabDaj tepHeymo' pagh buSlaw'. pe'vIl SaQtaH SuvwI', nachDaj joDmoHpu' ghaH; ghaHvaD meQtaH tIqDaj. DoqchoHtaHvIS mInDu'Daj, nguvchoHmoH 'Iwna' ngengHommey[4] pay' legh toy'wI''a'. SuvwI'vaD 'utlh QIn jatlhqa' toy'wI''a'. 'ach mIl'oD veDDIr SuvwI''e', SaQbe'choHQo' 'ej nachDaj joDHa'moHQo'; wuSDu'Dajvo' pagh mu' Qoylu'.

jangbe'mo' SuvwI', chegh toy'wI''a' 'ej roStevanvaD jatlh: «SoQ chonobmoHbogh vIHIjta'neS, 'ach QoyQo'. 'IHqu' ghaH, Dojqu', jul rurchu', 'ach tIqwIj Suj ghaH. qaStaHvIS poH nI' pa' jIratlhtaH; wa' mu''e' vIQoymoHlaHbe'.»

SIvchoH 'utlh. QeHchoH 'ej nuQchoHlu'. vaj loSbogh Hoch wa'maH cha' toy'wI''a'pu' ngeH 'utlh, 'ej ra'; jatlh «nuHmey HoSghaj tItlhap, pa' ba'taHbogh SuvwI'vetlh HIqem!»

jaHchoH toy'wI''a'pu'; SuvwI' luchol, mup'eghtaHvIS may'luchchaj. ngugh QoyDI' SuvwI', pay' QamchoH, SaQqu'taHvIS. mInDu'Daj pep 'ej roStevan lutoy'bogh SuvwI' ghom legh. wa' mu' neH jatlh: «baQa'!»; latlh jatlhQo'. mInDu' yachmeH ghopDu'Daj lo' 'ej qabDaj ghun QaDmoH. yanDaj QeymoH, DubDajDaq nIch vaHDaj tuQ'eghmoH, DeS'a'DajDaq DuQwI' poghDaj tuQ'eghmoH.

--------
[1] I'll happily go mu'qaD veS with anyone who wants to argue some more about how tuQ is used.
[2] The original is a whip.
[3] Not strictly canon, but meh, who doesn't understand it?
[4] The Georgian is /nagubari/ "dam, pool".
--------
SKI: We finally meet the titular Man in the Panther's Skin, but he's not very talkative.

QeS

 		 	   		  
-------------- next part --------------
An HTML attachment was scrubbed...
URL: <http://stodi.digitalkingdom.org/pipermail/tlhingan-hol/attachments/20120817/b171185c/attachment.html>