[Tlhingan-hol] mIl'oD veDDIr SuvwI': 'ay 6 - potlhbe'chugh yay, qatlh pe''eghlu'?

[Rohan Fenwick - QeS 'utlh]

To raise roStevan's spirits, 'avtanDIl has just challenged him to a shooting contest.

Warnings: Violence against animals.

6. potlhbe'chugh yay, qatlh pe''eghlu'?

ra' je 'utlh. «nIch munobmeH mutlhej wa'maH cha' toy'wI'pu', » jatlh. «SoHvaD, yap cha'DIchlI', SermaDIn. ghaH po' law' toy'wI'pu'wI' po' rap. qIpchu'bogh bachmey qIpHa'bogh bachmey je togh Hoch chaH; pupbogh De' 'ej lughchu'bogh lunob.» wamwI'pu'Daj ra' je 'utlh. «HatlhDaq pejaH, Ha'DIbaH tIghIj tlhIH 'ej tIHaw'moH,» jatlh. «negh yIjaHmoH je 'ej yIghommoH!»
tagha' van lopno' jaj 'uQ'a' je, 'ej QuchchoHpu' Hoch nuv.
po veb, nargh 'avtanDIl'e'. 'eq, jachbogh jajlo' Qa' rur. wammeH Sargh chIS lIgh ghaH; Doqqu' HIpDaj, 'IH qabDaj, 'ej mIv SuD tuQ; vaQbej chon SutDaj. 'utlh tlhej 'e' tlhob 'avtanDIl. SarghDaj'e' tIj je 'utlh, 'ej chon luruchmeH 'ej 'ovmeH nItebHa' mej. wammeH yotlh luDech wo' nuv law', DechmeH gho luchenmoH. Quch chaH 'ej luSeymoHlu'; chaH 'emDaq chon yotlh luSeH mangpu'. wa'maH cha' toy'wI'pu'Daj ra' 'utlh, jatlh: «ghotlhej tlhIH! beHmeymaj tIghuSmoH, nIch yIbachbeHmoH, nIch wIbaHbogh yItogh 'ej ray' qIpbogh nIch je yItogh.»
vumchoH Ha'DIbaH ghIjwI'pu', 'ej Hatlh Hoch 'ay'meyvo' chon yotlhDaq, tugh nargh Ha'DIbaH ghommey tInqu' lutoghlu'be'bogh: targh, chemvaH, boqrat, Supqu'bogh tIqnagh. bIH tlha'choH jawpu' toy'wI'pu' je; Dunqu' wanI'! jul tIHmey botchoH lam 'engmey, lam 'engmey puvmoHbogh Sarghmeychaj lemDu', puH lumuptaHvIS. HoHtaH chaH, bachtaH chaH, chon yotlhDaq 'Iw ghaymoHtaH chaH. nIchchaj lubaHta'DI' latlh nIch luqemtaH toy'wI'pu'. tagha' vIHqa'laHbe'qu' Ha'DIbaH QIDta'bogh chaH.
--------
SKI: roStevan decides on attendants for himself and 'avtanDIl, and the next day, the shooting contest proceeds.

QeS
 		 	   		  
-------------- next part --------------
An HTML attachment was scrubbed...
URL: <http://stodi.digitalkingdom.org/pipermail/tlhingan-hol/attachments/20120809/f01b230d/attachment.html>