[Tlhingan-hol] mIl'oD veDDIr SuvwI': 'ay' 5 - bI'IQchugh, yIvang!

[Rohan Fenwick - QeS 'utlh]

roStevan is down in the dumps again, and 'avtanDIl and Soghrat cautiously approached him to find out what's up.

Warnings: None.

5. bI'IQchugh, yIvang!

jatlh Soghrat[1]: «'o 'utlh, bI'IQlaw'. tagha' bImonbe'choH, bIQuchHa'choHlaw'pu'. meqna' Daghajba'; mIp'a' nobmeH puqbe'lI' nobqangqu'bogh ghIt lo'DI', beylI'lIj chImmoHta'. qatlh joH mojpu' SoHvaD qay'qu'chugh?»
SIbI' roStevan 'utlh merlu', 'ach tugh mon. ngIlqu'mo' Soghrat, belchoH 'utlh 'ej qeSwI''a'Daj naD. «batlh bIjatlhta'!» jatlh, «ghobe', muyIvbe'qu' wanI'vetlh. jIqur 'e' jatlhlaH nepwI'na' neH mupumchugh. ghobe', muyIvbe'qu', 'o qeSwI''a'wI'. 'ach muyIvbej vay': narghpu' naH jajmeywIj 'ej muchollI' yInwIj choS, 'ej wo'maj HochDaq, jIHvo' vaj tIghmey ghojlaHta'bogh loD'e' tu'lu'be'. puqbe' Dun vIghajbej, 'ej nenchoHtaHvIS ghojmoHlu'chu'ta', 'ach Do'Ha' puqloD munobbe'ta' QI'tu'. vaj yInvam vISIQtaHvIS jIbech. matHa' laH'e' QujwI' laH'e' je, murur pagh. chaq loQ murur 'avtanDIl, rut vIboQpu'mo' ghojmoHlu'taHvIS.»
'utlh SoQvam 'Ijpu' jaqbogh 'avtanDIl 'ej HemchoH. mon je ghaH; chISqu' Ho'Du'Daj 'ej wov montaHvIS. ghel 'utlh, jatlh: «qatlh bImon SoH? jIjatlhtaHvIS qanguqmoHpu''a'?» ghelqa', jatlh «qatlh chomon? qaHaghmoH'a'?»
jang 'avtanDIl. «meqwIj qaja',» jatlh, «jIjatlh 'e' Dachaw'chu'chugh. mu'meywIjmo' yImawchoHlu'Qo'; bIHmo' yIQeH'eghmoHQo', bIHmo' pIch HInobQo', bIHmo' HInaDHa'Qo'!»
«chay' SoHvo' mubelHa'laH mu'meylIj'e'?» jatlh roStevan. julvaD nIvbogh puqbe'Daj tIna'tInmo'[2] 'Ip ghaH, «SoHDaq pumbe' QeHDaj 'e' vI'Ip,» jatlh.
ghIq jangqangchoH 'avtanDIl, «vaj jIjaqtaHvIS jIjatlh!» jatlh. «matHa' laHlIjmo' tlhoy yIHem'eghmoHQo', 'o 'utlh. qamDu'lIjDaq lam tu'lu'bogh neH vIrur jIH, 'ach matHa' laH'e' jIH po' law' SoH po' puS 'e' vImaq. ma'ovjaj 'ej pe''eghjaj mangghommeylIj'e'! SoHvaD matHa' nIv tu'lu'be' 'e' Damaq SoH; 'e' DatemlaHbe'. vaj maSuDchuqjaj!»
jatlh 'utlh «choqaD 'e' vIbuSHa'Qo', 'ej choqaDHa'[3] 'e' vIchaw'Qo'! vaj yIra' 'ej beH DIchu'jaj; ma'ovchuq 'e' lubejjaj mangpu' quv; ngugh matHa' nIv wIngu'chu'.» Qochbe'chu' 'avtanDIl.
DaH belqu'choHpu' roStevan 'utlh. jatlhchuq 'ej qIDchuq ghaH 'avtanDIl je. Quch chaH 'ej loDHompu' rur. 'Ip chutHom luwuq chaH; 'ovchuqpu'DI' 'ej QapwI' toblu'pu'DI', qaStaHvIS wej jaj nachDajDaq pagh tuQtaH lujwI' net wuq.[4]

--------
SKI: roStevan regrets not having been able to do the Klingon equivalent of teaching his son to play ball, but 'avtanDIl reminds him that he had the next best thing and throws down the gauntlet to prove it.
--------
[1] Good thing this was Soghrat. 'avtanDIl would have had his arse kicked by tIna'tIn if she heard he was talking this kind of smack about her.
[2] Swearing an oath "by tIna'tIn" was tough. I used {-mo'}.
[3] "Retract one's challenge" vIHech. yajlu' 'e' vItul.
[4] Hardly seems a high stake for a guy who's just given up a crown he's worn for years, but eh. 'avtanDIl agreed to it.

QeS
 		 	   		  
-------------- next part --------------
An HTML attachment was scrubbed...
URL: <http://stodi.digitalkingdom.org/pipermail/tlhingan-hol/attachments/20120805/dfdea873/attachment.html>