[Tlhingan-hol] nuq bop bom: 'ay' wejmaH Hut

[Robyn Stewart]

Recap: First Officer 'ungya reported that 
ghutar's safety rope passed through a fissure in the hull.

39

loQ tlhegh luH yaS wa'DIch. tISchu' 'ej cholDI' 
megh'an, chIm. pe'lu'law'pu'. Som QIH nuDchoH. 
HeHmeyDaq chen QarghHommey. qeSmeH yaS wa'DIch 
jatlh “naQHa'taHvIS Som, chungmeH chuyDaH wIlo'taHmo' Som QIHlaH.”

Qochbe' HoD. Hota'ro'vaD jatlh, “Hoch chuyDaH 
yIchu'Ha'. jaS mavang 'e' DaHarchugh SIbI' 
yIjatlh.” mu'tlhegh cha'DIch jatlhnISmo' qeH HoD.

“Hoch chuyDaH ­ chu'Ha'ta', HoD!” jatlh Hota'ro'.

wanI'mey DeltaH yaS wa'DIch. QIH tI'laH yaS 
wa'DIch 'e' noH. tI'choHpa' QIH pojmeH Hur ghoS 
'e' Hech 'ach jejqu' Hoch baS HeHmey. tlheghDaj 
pe'be'meH Som HeH tlhegh QanwI' 'oghnIS 'ungya. 
chob'a'Daq chegh 'ej polmeH pa' Sam. DaSmey Sam. 
pu'HIch lo'taHvIS DaS 'uS 'ay' chev 'ej qam 'ay' 
woD. DaS 'uS 'ay'Daq tlhegh veghmoH. vIHlaH 
tlhegh 'ach Qan DaS 'ej vIHtaHvIS pe''eghbe'. puchpa'Daq chegh.[31]

yeptaHvIS, poSbogh Som vegh. HurDaq 'arghlaw' Som 
QIH. jorpu'DI' HoS QaymeH 'och, Som QIHlaw'pu' 
HanDogh DI. QIH law' tu'lu' 'ach Som DuQchu'be'. 
pujmoH neH.[28] ghaytan ghu'vetlhmo' chev Som 
'ay'. QIH Daqmey qonmeH Hoqra' lo' 'a HotlhlaHchu'be'.

meHvaD Qum, “SomDaq 'uch chuch SuD”

“puchvo' 'oH 'e' vIHar,” jang HoD. “puchpa' tlham 
chu'Ha' vay' QaptaHvIS bIQ pat.” bIQ pat qelDI' 
HoD, qIDtaH 'ej Hagh 'ungya Hota'ro' je 'e' qaw. qejchoH ghoghDaj jatlhtaHvIS.

qun HoD 'e' buSHa' yaS wa'DIch. “puch bIQ 'oHbe'. 
law'qu'. ngoghmey tInqu' lutu'lu'. ngoghmey tIn 
law' loD tIn puS. ghaytan bIrmoHmeH taS 'oH. 
jorDI' HoS QaymeH 'och chach taS chel pat, 'ach woD. taDchoH 'ej SomDaq vI'.”

“qay''a'?”

“'qay'be' chuch'e' 'a QIH So'mo' qay'laH.” jatlh 
'e' mev yaS wa'DIch, tlheghDaj vIHtaHvIS. vay' 
Huj tu'. “peloS. ghutar lom vItu'.”
----
SKI: First Officer 'ungya goes out through the 
hole in the hull to inspect the damage.
----
[28] The problem with autocomplete in an 
agglutinative language is that if you one time 
use a word like “neHchoHghachDaj” thereafter 
every time you want “neH” you are reminded of your indiscretion.
[31] I know there's a topology problem here. I 
didn't think it was worth the required words to 
explicitly reduce the topological genus of the 
makeshift ropeguard. You can decide for yourself 
whether he splits it up the side or feeds the 
rope through, or maybe they were zippered boots.