[Tlhingan-hol] vavwI' lut - 'ul

[ghunchu'wI' 'utlh]

loSmaH ben rut muchwI' ghom boQ vavwI'.
roD wovmoHwI' SeH, muchtaHvIS DawI'pu'.
ngugh muchmeH vaS tIn cher vengmaj DuSaQ.
tIn wovmoHwI' SeHlaw 'ej Qatlh.
raS rur SeHlaw.
law'qu' leQmey.
Hoch wovmoHwI' ruQ SeHbogh nuv.

pa' le'Daq SeHlawvam jomlu'.
vaS 'o'Daq jen SeHwI' pa'.
muchwI'pu' SeHwI'pu' je chev Qorwagh.
vaj much leghlaH SeHwI' 'ach SeHwI' Qoybe' much bejwI'.

nom Duy'choH SeHlaw.
wovHa' 'op wovmoHwI'mey.
SeHlaw tI'meH vavwI', 'oH lagh 'ej poj.
tlhoy tujchoH bobcho' mach.
law' bobcho'mey.
Hoch bobcho' teq ghaH 'ej qa'meH nIv jom.
Qapqa' SeHlaw.

wa' jaj pa'Daq latlh luch jomnIS DuSaQ.
choHnIS SeHlaw Daq.
tIn SeHlaw 'ej 'ugh.
reDDaq rar 'ul SIrghmey law'qu'.
tIqbe' SIrghmey.
SeHlaw Daq chu' luSIchmeH yapbe'.
SeHlawDaq SIrgh tIq chelnIS vay'.
ram vumchoH vavwI' maqochDaj je.

SeHlaw 'ul luchu'Ha'.
QaD SIrghmey 'e' lu'ol.
wa' SIrgh tIn wIv vavwI'.
maqoch ja' <yIpe'. yIruch. lugh SIrghvam 'e' vIlay.>
SIrgh pe' maqoch.
SIbI' luj Hoch wovmoHwI'mey.
Hurghqu'choH pa'.
tamqu'choH pa', lujmo' je yIntagh.
ghop wovmoHwI'Hom luSam.
lojmIt lupoSmoH.
Hurgh chob.
latlh qach mIch lunuD.
Hurgh qach naQ.
Hur lughoS.
Hurgh retlh qachmey.

beb lojmIt luSam 'ej bebDaq toS.
bebDaq QamtaHvIS, Hurgh bID veng 'e' lulegh.
bItba' chaH.
ghelchuq <wIta'pu''a' maH?>

tagha' vIt lughoj.
Sumbogh 'ul pat potlh puypu' yavDuj.
pIch ghajbe' pe'wI'pu'.
quq neH pe'pu'ghach puypu'ghach je.

wanI'Daq jIjeSbe' jIH, 'ach muSIghba'.
reH qach 'ul SIrgh vIpe'pa', jIyev.
jI'Ijqu'.
yavDuj ngaDHa' vIQoybe' 'e' vI'ol.
ghIq SIrgh jIpe'.

-- ghunchu'wI'