[Tlhingan-hol] Hoghvam qaSpu' (2011-09-17)

[Brent Kesler]

wej lutHommey vIgherta'!

reH may'mey vIDel vIneHbe', vaj yurop qummeyvaD qay' Huch 'e' vIDel
'e' vInID. Qatlhqu'. ghar qummey 'e' vIDel je.

bI'reng

# # #

== qabul botlhDaq DoSmey HIv talIban SuvwI'pu' ==
qabul 'avghanIStanDaq wej DoSmey HIvta' talIban SuvwI'pu': 'amerIqa
rIvSo', waw'­'e' ghajbogh {neyto} -- tera'Daq QI' boq -- 'avghan
ghoqwI' tum je. HIvpu'bogh ghom chenmoH wa'maH SuvwI'pu' net Qub.
DoSmeyDaq chaHom lubaH 'ej latlh DoSHommey Samta' cha' jor'eghwI'pu'.
qach rInbe' luDan HIvwI'pu' 'ej qaStaHvIS cha'maH repmey, pa' 'avghan
qum negh lutlhaS. 'avghan negh QaHmeH ghoS chalbeq. mon botlhDaq
gharwI' mIch tu'lu', vaj po'nIS SuvwI'pu', 'ach qumvaD neytovaD je
Dojbe'. Sepchaj Hubrup 'avghan Hubbeq 'e' Har anderS vogh raSmuSen,
neyto Qang, 'ej neyto mangghom gheSrup 'avghan negh ja' 'avghan
DevwI'quv HamID qarSay.

== Huchnab chu' lajta' 'ItalIy ==
QortaHvIS bepwI'pu, 'avwI'pu' je, Huchnab chu' lajta' 'ItalIy yej'a'.
Huchnabmo' rewbe'pu' ruptaH qum 'e' ghur 'ej toy'taHmeH 'e' nup.
yuromey -- tera'Daq Huch Segh lo'lu'bogh -- bIH law' ngIppu' 'ItalIy
qum, 'ach DIllaH 'e' Hon latlh qummey. teHchugh, ghrIs rur 'ItalIy.
yuromey'e' ngIppu'bogh, DIllaHbe'law'taH Sepmey puS 'ej yuro Huch boq
DejmoHlaHlaw' ghu'vam. yuro Huch boq chenmoHtaH wa'maH Soch Sepmey.
qum pIm ghajtaH Hoch Sep, 'ach wa' Huch Segh neH lulo'taH Hoch
Sepmeyvam. qaStaHvIS wej DIS, Dochmey DIlmeH Huch HutlhtaH tera' 'ej
Dejchugh yuro Huch boq, 'arghlaH ghu'vam.

== lenglI' tIrqIy Qang ==
libya', 'IyjIpt je Suchta' tIrqIy Qang rejep tayyIp 'erDowan.
'IyjIptDaq ghoSpu'DI', lurI' ghom'a'mey Quch. SuchtaHvIS, 'arab
Sepghom yejDaq jatlhta' 'ej pa' 'Israyel naDHa'pu'. ja' 'erDowan Qang,
batlhHa' paleStInnganpu' che' 'Israyel 'ej merI'tIrenyen bIQDaq
tIrqIynganpu' HoHpu' 'ach tlhIjQo'. lIbya'Daq qum chu' luchenmoHlI'
lotlhwI'pu' 'ej muwamar qadavIy HI'tuy' lujeymeH bechpu' roghvaH 'e'
naDpu'. DISvam, tera'Daq qaStaHvIS jarmey tuj, HI'pu'chaj qaDlI' 'arab
roghvaHmey puS. puSwen ghu'vam par tIrqIy, 'ach DaH lo' 'e' nID,
HoSDaj DubmeH. 'ISlamwI' roghvaH ghaj tIrqIy, 'ach HI'tuy' Dabe', vaj
'eSya' tIngDaq chovnatlh qub gheStaH. qummey chu' chenmoHtaHvIS
qaDwI'pu', pIlmoH 'ej juppu' chu' tu' neH tIrqIy.