[Tlhingan-hol] Hoghvam qaSpu' (2011-10-01)

[Brent Kesler]

qarmeH, wa' Hogh ret qaSpu'. jIpaS.

bI'reng


== toghmeH jaj wIvta' 'IyjIpt ==
chennISmo' yej'a', Hoch tlhachvaD naDmey toghmeH, jaj wIvta' 'IyjIpt
QI' qum. jar wa'maH wa', jaj cha'maH chorgh, naDmey togh 'e' tagh qum.
mIwvam muv 'e' Hechchugh tlhach, qaSDI' jar wa'maH, jaj wa'maH cha',
qumvaD ja'laH. qummey chenmoHmeH, pIj naDmey togh tera'nganpu'. tlhach
naDDI' wa' rewbe', wa'logh pe''egh tlhach. yej'a'Daq HuSmey wavmeH,
pe''eghghachmey togh tlhachmey. pe''eghghachmey law', HuSmey law';
pe'eghghachmey puS, HuSmey puS. lumuvbe' 'e' lubuQpu' tlhachmey puS.
HuSmey Suq mubaraq tlhach pabwI'pu' 'e' lubotmeH, mIw choHmey lupoQpu'
latlh tlhachmey. Hoch choHmey lajbe' QI', 'ach choHmey puS lajpu', vaj
buQ 'e' lumev tlhachmey. chorghwen morghtaHmo' ghom'a'mey, mubaraq
DevwI'quv SughHa'pu' QI'. yej'a' HuSmey wavmeH, reH naDmey togh 'e'
luneH 'IyjIptnganpu' law'.

== 'al 'awlaqIy HoHlu'ta' ==
yemenDaq 'ISlam pIn 'anwar 'al 'awlaqIy HoHta' 'amerIqa Sepmey tay'.
lengtaHvIS 'al 'awlaqIy, HIvmeH qoq puvwI' ngeHpu' 'amerIqa botlh
ghoqwI' tum. 'al qayDa QonoS gherwI', SamIr Han HoHta' je. ralnIStaH
'ISlam 'ej 'amerIqa HIvnIS 'e' ghojtaH 'al 'awlaqIy. luHIv nuvpu' puS
'e' pIlmoHta' SoQmeyDaj. DIS cha'SaD Hut teQaS QI' waw'Daq wa'maH wej
negh HoHta' nIDal 'aSan, 'ISlam pabbogh yaS. DIS cha'SaD wa'maH
Detroyt ghoSbogh challupwI' jor 'e' nID 'umar varuq 'abDul mutallab,
nayjIrya' ghojwI'. DIS rap nuyorq veng botlhDaq lupwI' jor 'e' nID
vaySal SaSaD, paqIstanDaq boghpu'bogh 'amerIqa rewbe'. qaStaHvIS wa'
DIS, vIrjInya'Daq 'ISlam chIrgh Devpu' 'al 'awlaqIy. qaStaHvIS
poHvetlh, Sepmey tay' muSchoHpu', 'ach chIrghDaq Qoch latlh pabwI'pu',
vaj DIS cha'SaD cha' yemen DabmeH mejta'.