[Tlhingan-hol] nuq bop bom: 'ay' SochmaH: <ram 'oy'>

[Qov]

Today's story content continues to include violence, blood, agonized 
screaming and the thump of falling bodies.

70

vIHtaH HoD. ghol nuH 'ugh law' HoD nuH 'ugh puS. way'nISDI' HoD, HoD 
'oy'moH 'ughwI' 'a nuH vIHnISDI' ghol, ghol 'oy'moH. nIHDaq jop HoD 
'ej tlha'DI' ghol yItHa'. 'eb jon HoD, ghol 'uS mup HoD 'etlh. 
reghchoH jagh 'ej QamHa'choH. ghIrchoHDI' 'etlh, HoHmeH jop HoD 'a 
ghaH poS volchaH mup vay'. DaH HoD HIvtaH cha' jagh. regh volchaHDaj 
'e' Sovbe' 'a 'oy'. meqleH baQ 'ej luDechbe'meH jagh, HeD. DaH HIch 
lellaH. nIH DeS voqtaHvIS meqleH 'uch HoD, pu'HIch leltaHvIS poS 
ghop. pu'HIch QeqlaHpa' jev cha' jagh. qu'! pe'vIl HoD DeS mupchoH 
jagh cha'DIch nuH. 'etlh tIq 'oH. junmeH tlhe'qu' HoD, vaj DeS mupbe' 
'ach HIch qIp 'etlh 'ej chaghmoH. noDmeH meqleH pep 'ach Do'qu' jagh. 
meHleH botchu' 'ej pe'vIl vajar DeS qIp. Hom wab tu'be' jagh 'e' tul 
vajar. Soy' ghop, meqleH baQqa'taHvIS. DaHjaj nIteb meqleH 
yanqa'laHbe' nIH ghop. HoD qam retlhDaq Qot pu'HIch 'a woHmeH 
joDchugh mupbej jagh.

ravDaq jachtaH jagh rIQ. rav Qarghmey ghoS 'Iw 'a qam bIngDaq 'Iwmo' 
charchoH choQ. jach Hota'ro'. Quchbe'law'. HoD 'emDaq pum porgh 'e' 
Qoy. choQDaq Doq 'op 'Iw.

DaH DoHchugh HoD, pu'HIch woHlaH wa' jagh HubtaHvIS latlh. pu'HIch 
ghajchoHchugh 'oraya'nganpu'vam ghutar Hota'ro' HoD je HoH. naDev 
cha' nuv SuvnISmo' Qatlhqu' Qu'. Sov je 'oraya'nganpu'. ravDaq 
chaHlaw' ghutar'e' Hota'ro''e' je 'e' luSov HoD jaghpu' je. 
leSchoHlaw' jaghpu'. vajar HoHrupchoHmeH Holchaj mu'mey jatlh. leSmeH 
'eb jon vajar, HIvchu'meH 'eb nejtaHvIS. 'ebvetlh SamDI' meqleH pep 
'ej QamHa'bogh jagh rIQ HIvchoH.

Hub'eghmeH DoH HoD ghol. HughDajDaq 'etlh Qach HoD 'ach way'rupbejmo' 
pay' choH 'ej ghop neH DuQ. jach ghol. nuH 'uchHa'choH. ghopDu'Dajvo' 
betleHHeyDaj nIH HoD. 'uchDI' cha' ghop 'oy'qu' poS volchaH, nIH DeS 
je. 'ach qaStaHvIS tup puS Qutlhchuq DeSDu' 'e' tul. 'oy' SIQlaH. nuH 
ngol 'ej chaQ vajar, jagh qab mup, chaq mIn DuQ. reghqu'. qImHa'moH 
vajar 'oy'. 'etlh 'uchlaHbe'pa' chaq wa'logh mupqa'laH. Do' DoHchoH 
cha' jagh. pu'HIch woHmeH HoD tlhoy SumtaH jaghpu', 'a qIpmeH tlhoy HoptaH.

SKI: The captain faces two opponents while his pistol is just out of reach.