<p><br>
taghbej SoQmey paQDI'norghmey je!  po'be'wI'pu'vaD SoQjatlhtaHvIS Quvar, ja'chuqmeH loQ po'wI'pu', tlhIngan Hol wIlo'taH.  </p>
<p>qaStaHvIS jaj cha', SaH TV-beqpu'.  Huj chaH.  Saghbe'law'.  nunuS luneHlaw'.  "World's Strangest Hobbies" 'oH muchchaj'e' 'e' vIHar.  </p>
<p>ngIq ghojwI'vaD pImbogh mu'mey puS nob ghojmoHwI'.  Qu' ta'meH ghojwI'  mu'meyDaj'e' Hevbogh qawnIS 'ej SIbI'Ha' yu'DI' ghojmoHwI' jangchu'nIS.  latlhpu' yu'meH ghojmoHwI', DoyIchlan Hol lo' ('ej jangmeH tlhIngan Hol jatlhnIS ghojwI').  jIHvaD Qu' QatlhmoHmeH le' mIw: muyu'meH tlhIngan Hol lo' 'ej jIjangmeH DoyIchlan Hol vIjatlh.</p>


<p>wa' mu' chu' wIghoj. tera'ngan De'wI' rarbogh pat'a''e' 'oS <tera'ngan [mu' chu']>.  Qo'noS [mu' chu'] 'Itlh law' tera' [mu' chu'] 'Itlh puS 'e' Har tlhInganpu'.  (wej [mu' chu'] vI'ang, vI'ang net chaw' 'e' vISovbe'mo'.)</p>


<p>nuqaD je <qaD'a'>.  po'be'wI'pu'vaD qaD'a'na' 'oH 'ach po'wI'pu'vaD qaD'a'qoq neH 'oHba'.  ghItlhHom'e' qonta'bogh 'ISqu' ngaS qaD'a'.  laDnIS qaDlu'wI' 'ej ghelmeH mu'tlheghmey jangnIS.  maqaDqu''eghmeH Philip Newton, jIH je, ghItlhHom leghbe'taHvIS wa' ghogh lo'taHvIS latlh, laD latlh.  vaj QatlhchoH qaD.</p>


<p>paq chu' vIje'.  Haynes toQDuj tI'meH paq 'oH.  'IH.</p>
<p>tlhIngan Hol pab wIpoj je Philip jIH je.  mu'tlheghvammey DIqel: {vagh [jengva'/ngop] [wI/DI]ghaj}.  lughlaw' {vagh ngop wIghaj}, {wa'vatlh QaS yItlhap} lo'mo' <Klingon Monopoly>.</p>
<p>nentay mu'tlheghmey ghoj qepHom jeSwI'pu' 'ej nentay wIlop:<br>
- DaHjaj SuvwI''e' jIH!<br>
- tIqwIj Sa'angnIS!<br>
- 'Iw bIQtIqDaq jIjaH!<br>
- may'wIj 'oH may'vam'e'!<br>
- jach 'Iw vIpoQ!<br>
- qamDu'wIjDaq Heghpu'bogh jagh tu'lu'!<br>
(jIloptaHvIS loQ jIjatlhHa': *{jach 'Iw vIpoQ}.  jIjachqu'ba'mo', yabwIj Dan {jach}.)</p>
<p>SoQ jatlh je DuSaQ'a' ghojmoHwI''a''e' rItta'bogh Quvar.  Hov leng, Hov noHmey ngotlhwI'pu' bop.  tlhaQqu' muchDaj.</p>
<p>qaStaHvIS jaj wej ram tach wIghoS.  Quvar be'nal juppu' DIghom.  tlhutlhqu' tlhInganpu' 'ej lopqu'.  mebpa'mey wIcheghpa' qaSpu' bID ram.</p>
<p>--<br>
De'vID</p>