[Tlhingan-hol] tagha'

[lojmIt tI'wI' nuv 'utlh]

SuStel: qaSpu’ wa’maH vagh DISmey. tagha’ choHIvmeH meqlIj DaQIjpu’. qatlho’. DaH jIyajchoHlaw’.

qechmeylIj vIlajQo’DI', qaQeHmoH ‘ej bortaS DapoQchoH. bIQuchchoHmeH choHIvta’, ‘ej choHIvta’DI’ bImaq. jatlh <<qa’oy’moHchugh, jIQuch! qarIQ ‘e’ vIHechbej!>>

jaS jIQub.

qechmey vI’oghbe’. vIjon neH. qech vIqonpu’bogh vIparHa’chugh, QIntetlhvamvaD vInob. qechmeywIj bIHbe’. vInobta’mo’ qechmeymaj moj. par ‘op nuv. parHa’ ‘op nuv. qechmey DIlaj’a’? nItebHa’ mawuq. lajbe’chugh QIntetlh, mutIchbe’ wuqpu'ghach. chaq loQ jI’IQchoH, ‘ach vItIchlu’be’. chaq jIvIng. Sub jiHbe’. jIvIngmo’ pIch vIghaj, ‘ach bortaS vIpoQbe’.

wIgh SoH chaq ‘e’ DaHar. ngoDvam tob qechmeylIj chaq DaneH. vaj qechmeylIj lajHa’lu’chugh DatIchlu’, ‘ej bortaS DapoQ.

Dojqu’ laHlIj. laHlIj vIvuvqu’. bIvalqu’ ‘e’ vIghov. bIvalqu’ba’.

wigh SoHbe’.

qatIchbe’. ngoD nap vIghov neH. wIgh jIHbe’. wIgh SoHbe’. wIgh ghaHbe’ ghunchu’wI’’e'. wIgh ghaHbe’ Qov’e'. wIgh ghaHbe’ Qanqor’e’. wIgh ghaHbe’ Seqram’e’. wIgh ghaHbe’ Da’vID. wIghpu’ maHbe’. qay’be’. wIgh maH Do' net poQbe’.

chaq wIghHom ghaH ‘oqranD’e'. Holvam ‘ol. jonbe’. ‘ol. potlhbe’, ‘ach Dajchu’.

wej jaghpu’ Daghajlaw’, ‘ej wa’ jIHlaw’. ‘e’ Da’ang. jaghlIj jIH vIneHbe’, ‘ej maHIvchuq vIneHbe’. choHIvpa’ not qaHIv. qechmeylIj vIlajbe’, ‘ach qaHIVbe’.

qechmeylIj vIlajbe’DI’ qatIch ‘e’ vIHechbe’. jIyuDHa’ neH. qechmeylIj bIH’a’? qechmeyvam qonta'’a' latlh? jISaHbe’. Hol choH ‘e’ nID qechmeyvam, vaj vIlajbe’. Hol choHlaH ‘oqranD. wIchoHlaHbe’.

vuS ghaj ghIQmeH poHwIj. Hoch DIS jIwuqnIS. qep’a’ vIghoS’a’? chaq choHIvqa’, ‘ej chaq muHubQo’qa’ juppu’qoqwI’.

mutlhob latlh jup. jatlh. <<mutlhej’a’? *Oshkosh*Daq wa'netlh muDDuj vaghbIp nuvpu’ je vISuch.>>

DuHmeyvam vIqel. *Oshkosh* vImaS. pa’ not muHIvlu’, ‘ej HIvchoHlu’chugh, muHubbej juppu’wI’. ngeD wuqmeH Qu’wIj.

lojmIt tI’wI’ nuv ‘utlh
Door Repair Guy, Retired Honorably