[Tlhingan-hol] NaNoKlingMo - lalDan tay ta' puqbe'wI'

[Bellerophon, modeler]

juHwIj wutlh pa'Daq rav bI'taHvIS, 'echletHommey vI'tu'pu'. ghaytan
tlhoyDaq paq'echletvo' pumpu'. vIleghDI', wanI' potlh muqawmoH.
'echletHomvam qoDmeyDaq ghItlhlu'pu'. <Sylvia pIHoy'>, rurbogh mu' ghap
jatlh. puqbe'wI' ghaH Sylvia'e'.

wej ben qaSchoHDI' DISDaj wa'maH wejDIch, lalDan tay ta'. lopmeH SaHta'
jupma' law' QorDu'maj law' je. 'echletHomvam ngeHta' latlh. yISra'el Hol
laDlaHmeH Sylvia, qaStaHvIS wej DIS HaDlI'. tay ta'meH, lalDan paq 'ay'
laDnISchu' 'ej pe'vIl jatlhnIS. vagh paqmey yugh lalDan paq. paq loSDaq
'ay'Daj tu'lu'. paqvamvaD mI'mey ponglu'.

tay taghlu'pa' bIt Sylvia, 'a qaStaHvIS tay, laDchu' 'ej jatlhchu'. 'ay'Daj
bopbogh SoQ'e' qonnISpu' 'ej jatlhnISpu' Sylvia. Dal 'ay'Daj HochHom, 'a
mu'mey potlhqu' ngaS je. 'ay'vam Daj bop SoQDaj. chuD naDmeH lalDan yaS,
mu'mey ghajta' Qun. mu'meyvam jatlhlu' <lInaDjaj 'ej lIQanjaj Qun. tlhIHvaD
qabDaj wovmoHjaj Qun 'ej lIquvmoHjaj. tlhIHvaD qabDaj pepjaj Qun 'ej roj
lInobjaj.> mu'meyvam jatlhtaHvIS lalDan yaS, mInDu' SoQnISmoHtaH Hoch
latlh, 'ej ghopDu'Daj pep yaS. qaywI' qewwI' je jojDaq ghopDu'Daj poSmoH.

SoQDaj jatlhtaHvIS Sylvia, ja' <nenchoHpa' Leonard Nimoy, mInDu'Daj poSmoH.
lalDan yaS ghopDu' leghpu'. Spock DataHvIS, qawpu'. vanmeH vulqangan, ghop
Deghvam chuppu'. Deghvam peghlu'bogh noychoHmoH.> muHemmoHpu' Sylvia.
~'eD

-- 
My modeling blog:          http://bellerophon-modeler.blogspot.com/
My other modeling blog:  http://bellerophon.blog.com/
-------------- next part --------------
An HTML attachment was scrubbed...
URL: <http://mail.kli.org/pipermail/tlhingan-hol/attachments/20151127/d7388226/attachment.html>