[Tlhingan-hol] jaj le'qu'

[Brad Wilson]

wa'Hu' ram wanI' le' wIlop be'nalwI' jIH je. wejmaH loS ben boqchuq tuqmaj. rItlh mIlloghmey Hewmey je cha'bogh qach wISuch; ghIq Qe'Daq maSop -- tera' Soj neH tu'lu' 'ach 'ey'. Dochmeyvam neH DIta'chugh yap. 'ach latlh Doch wIta' -- <tlhIngan ram nI' bom> wIlegh.


«wa'SIngton»Daq wa' much neH tu'lu' 'ej tIqDu' 'angchu' ghom. «Avant Bard» 'oH ghom'e' 'ej tlhej muchwI' le' je; «Marc Okrand» ghaH. cha'maH leghwI' vItogh 'e' vInoH -- tlhoS buy' Hoch quS. HurghchoHDI' pa' buy'moH QoQ. vaj bI'reS 'oH. DaqHom wovmoH wa' tIH 'ej DaqHomvetlhDaq QamtaH vulqangan. qaStaHvIS much leghwI'pu'vaD lut QIj; Qu'Daj 'oH. (tlhIngan Hol, tlhIngan nugh joq yajbe' leghwI'pu' law'.) maHvaD QIj vulqangan: batlh ghajbe'bogh tlhIngan ghaH «SQuja'». reH Qaq «SQuja'». qur; verengan rur. matlhHa'; romuluSngan rur. qej; veqlargh rur. ram nI' tay 'oH 'ej qaDDaq 'ovmeH SuvwI' ngeH Hoch tuq. ta'mey Dun, bommey Dun je tu'lu' -- 'a jeSQo' «SQuja'» 'ej Hoch lop Qaw' neHlaw' ghaH. qaStaHvIS ram «SQuja'» Such wej qa' chIvo'Daj lu''angmeH. tlhetlh repmey 'ej qa' tlha' qa'; ben, DaHjaj, pIq je 'ang qa'pu'. tagha' QaghDaj Sov «SQuja'»; qaSpa' ramvam nuch DataH 'e' yaj 'ej 'Ip lay' -- SuvwI'na' ghaHchoH !! Hoch vInDa'pu'Daj QIHHa' «SQuja'» 'ej batlh ghaj. vaj bertlham 'oH.


muDuQchu' muchvam. vIttlheghmey'e' Sovbogh Hoch tlhInganna' buy'. Humanpu'vaD tlhoy'Daq DIvI' Hol mu'mey 'aghlu'. rut mu'mey jatlhlu'bogh 'oSbe' mu'mey 'aghlu'bogh. ram. ghom vInaD; majqu' QIchchaj 'ej puv 'op. «SQuja'» 'oS «Marc Okrand» 'ej motlh pup QIchDaj. ram van lopno'. «Marc Okrand», «Christopher Kidder-Mostrom», DawI'pu' je vIqIH.


pel'aQDaj ghorpa', muchvam yIlegh !!
-------------- next part --------------
An HTML attachment was scrubbed...
URL: <http://mail.kli.org/pipermail/tlhingan-hol/attachments/20141217/f03f00d4/attachment-0001.html>