[Tlhingan-hol] mIl'oD veDDIr SuvwI': 'ay' 16 - wa' Qu'vaD, wa' DevwI' tu'lu'

[Rohan Fenwick - QeS 'utlh]

'avtanDIl had just told his pupil and age-mate SermaDIn that he would be leaving him in charge while 'avtanDIl was carrying out a mission, and in this section he goes on to explain further what he desires SermaDIn to do.

Comments, critique, rotten cabbages etc. all welcome.

--------
16. wa' Qu'vaD, wa' DevwI' tu'lu'

SermaDInvaD QIjtaH 'avtanDIl: «wa'DIch, SuvwI' jIH» jatlh. «batlh bangwI' vItoy'meH jIjaHrup 'ej jIjaH vIneH. joHvaD matlhchugh vay', lugh; toy'wI'na' DanIS toy'wI'. toH, meQtaHbogh qul mevta', 'ej meQbe'choHchu'pu' tIqwIj'e'. San qabvaD torbe'nIS vay', 'ach San qaDnIS. Hoch jawpu''e', Hoch toy'wI'pu''e' je, jupwI' nIv SoHbej, vaj nujwIjvo' De'vam yIQoychu': SoHvaD yoS jaw, mangghomwIj ra'wI' je qagheSmoH. Qu'vam luQorghlu'meH, latlh vIvoqqangbe'qu'.
«ghobmeH negh yIDev, chuQun tIche'; De' chu' ja'lu'meH qumvaD QIn qengwI'pu' tIngeH, jIHvaD QInmey ghItlhmey je tIqon, nobmey waghqu' tInob; naDev jIHbe'taH qatlh net SovnIS? QI' Qu'meyvaD, chon che'ronDaq je HI'oStaH.  naDev wej DIS HIloStaH 'ej peghwIj'e' yIpeghtaH. chaq jIcheghbej jIH 'ej nguvHa'choHbe' tIqwIj lav; 'ach jIcheghbe'chugh, jIHvaD yISaQqang, jIHvaD bey'a' yIjachchu'.
«SIbI' 'utlh yIjatlh – Qu'vam DatIvbe'bej – 'utlhvaD HeghwIj yImaq, chechwI' DaDataHvIS. ghaHvaD yIjatlh: ‹SuvwI'vaD qaS rIntaH wanI' junlaHbogh pagh.› mIpbe'wI'pu'vaD mIpwIj yInob – naghbochmeywIj HuchwIj je. mIwvam DarInmoHta'DI' choQaHlaHchu'ta'; jIHvaD nIvqu' boQvetlh. tugh HIlIjQo', pIj jIHvaD yIQub, jIHvaD San QaQ yItul, qa'wI' choqlu' 'e' yIqoy'. puq Qup jIHpu' 'e' yIQub, 'ej jIHvaD vav tIq Dajaj tIqlIj'e'.»
SoQvam Qoypu'DI' toy'wI', SIvchoH 'ej HajchoH. Doqqu'choH mInDu'Daj; tlhoS reghchoHlaw'. jatlh SermaDIn: «chay' bellaHtaH SoH DuHutlhtaHbogh tIq'e'? naDev bIratlhQo' 'e' vISovchu', vaj Qu'vam Dachav 'e' vIbotlaHbe'. qatlh bIjatlh, ‹HI'oStaH›? chay' jaw lIw vImojlaH, chay' qaDalaH qoj qarurlaH? bImob chay' 'e' vISIQ? jIH mughupchu'ta' yav 'e' vImaS. naDevvo' mamejjaj maH cha''e'; qatlhejbej, qamuv 'e' yIchaw'!»
jang SuvwI': «HIQoy» jatlh. «qavItbej 'ej jIlumbe'. nuv DuQpu'DI' parmaq, HatlhDaq leng neHchugh nuv, nIteb lengnIS. Dom SuqlaH pagh, je'be'chugh 'ej tlhongbe'chugh; mIghbogh loD'e' 'ej maghbogh DuQnISlu'chu', yan lo'lu'taHvIS. 'IvvaD peghwIj vI'anglaH? qotlh pagh latlh. 'IvvaD loH vIgheSmoHlaH? Qap pagh latlh. raQmey cher jagh 'e' DabotmeH, veHmey tIrachmoHchu'taH. chaq jIchegh, HewIj mISchoHmoHbe'chugh vay'.
«wa' nuv, wa'vatlh nuv joq HoHbej Qob. jImobtaHchugh, reH mutlhejtaH QI'tu', qeylIS qa' je. wejnem naDev vIghoSbe'chugh, vaj bISaQ 'ej nol Sut DatuQmoH net pIH. SoHvaD QIn vIqon; DaghajtaHvIS, nIlobnIStaH toy'wI'pu'wI'.»

--------
SKI: 'avtanDIl continues to outline his requests to SermaDIn, while SermaDIn gets all emotional about the departure of his captain and the responsibilities that have now been placed upon him.

QeS
 		 	   		  
-------------- next part --------------
An HTML attachment was scrubbed...
URL: <http://stodi.digitalkingdom.org/pipermail/tlhingan-hol/attachments/20130111/a3eb653f/attachment.html>