[Tlhingan-hol] nuq bop bom: 'ay' wa'vatlh HutmaH wa': lurDechmey tIQ
Qov
robyn at flyingstart.ca
Thu May 17 15:32:18 PDT 2012
Mahoun had persuaded Essim to allow him to tow her underwater in
order to enter a cave.
191: lurDechmey tIQ
Dech bIQ. 'uychoH bIQ. qaStaHvIS bovHey Mahoun qam 'uchqu' 'eSSIm
'ach bIQ cherghlaHbe'mo' qam 'uchHa' 'ej Sal 'e' nID. naghDaq nach
qIpqu'. mermo' pur 'e' nID. voQchoH. 'eSSIm yab yotlI'mo'
lImtaHghachDaj QublaHbe'chu'. taj lel 'e' nID. ghop bot vay'. 'eSSIm
voQlI' bIQ. yebDaj 'uchchoH vay' 'ej luHpu'. tuSchoH. Hurghqu'.
mInDu'Daj poSmoH 'a choHbe' qo' qIjqu'. jachchoH. jach! muDDaq jach.
tlhuHtaH 'e' tIv. 'uchtaH Mahoun. naDev muD bIr law' Hur muD bIr puS.
ghuntaH 'ach QomchoH 'eSSIm SomrawDu'. DIS leghlaHbe'. Mahoun
leghlaHbe'. ghopDaj'e' leghlaHbe'. Mahoun 'uchqu'choH. tuSqa' 'eSSIm.
bIQ 'Iq ghuppu'. 'emchoH. jIbDaj 'uch Mahoun.
ropbe'choHDI' 'eSSIm, jatlh, "Mahoun, bIQDaq ghIrvIp be'vam.[210]
jIQallaHbe'." loQ HaghDI' Mahoun, jatlh 'eSSIm, "HIvaqQo'! Qalbe'
tlhIngan. maQallaH 'e' luchaw'be' porghmeymaj."[256]
"jISov," jatlh Mahoun. "bIyoHqu'. bong qID Dajatlhpu'mo' jIHagh.
vIQIj. yuQwIjDaq bIQ'a'Daq law' puHHommey mach. puHHom rap Dabbogh
nuv'e' ngagh vay' 'e' tuch lurDechmaj tIQ. vaj ngaghrupDI' no'ma',
QalnIS. vaj <not ngaghpu'> 'oStaH <QallaHbe'>. DaH choHpu' nugh 'ach
ratlh qech." yev Mahoun. 'eSSIm qabvo' jIb bI', ghIq 'eSSIm qab
'uchmeH ghop lo'. jatlh, "qaSaHqu'. puHHom Hop DaDabchugh qaghoSmeH,
qaStaHvIS Hogh jIQalqu'qang."
DaH tlhIngan tIgh cha'pu' Mahoun, 'ach 'eSSIm HaghmoHbe'. bong
ta'pu''a' Mahoun? Sovbe' 'eSSIm, 'ach wuqmoH. Mahoun qab tun SammeH,
DIS HurghDaq SIch 'eSSIm nItlhDu'. Mahoun woS Dop 'uchchoH 'ej chIch
jatlh, "wIj Doq."[250]
"wIj 'Iv? jIyajbe'," jatlh Mahoun. vaj Sovbe'pu'.
"wIjtaH pagh," jatlh 'eSSIm. "tIQmo' tayvam, no' Hol wIjatlh. DaH
<maj Doq> yIjatlh." Mahoun tojbe'lI'. lobpa' ghelbej Mahoun.
"nuq 'oS tay?" jatlh Mahoun.
jatlh 'eSSIm, "mangaghpu'mo' ma'Ip. qanay." Mahoun qab leghlaHbe'mo'
'eSSIm, QeychoH 'eSSIm tIq, loStaHvIS.
jatlh Mahoun, "maj Doq."
MahounvaD mu'mey SeQ ghojmoH 'eSSIm 'IptaHvIS. loDnalDaj chu'
leghlaHbe' 'eSSIm, 'ach 'uchlaH.
---
SKI: In a dark cave, Essim bonds with Mahoun.
---
[210] She's evading saying jI-X-vIp.
[250] Traditional gestures and no' Hol taken from the TNG episodes
"The Emissary" and "Reunion". The ritual is never completed there and
I was shy about making it up for myself, so I elided that.
More information about the Tlhingan-hol
mailing list