[Tlhingan-hol] nuq bop bom: 'ay' cha'vatlh cha'maH: raSmey lughorlu'taH
Qov
robyn at flyingstart.ca
Sat Jun 23 20:07:26 PDT 2012
vajar's increasingly inaccurately named birthday party released the
guard they captured, in advance of the expected next group of troops.
CONTENT: violent death
220
raSmey lughorlu'taH
tlhoy' yIbmeyvo' narghchoH SIp. SIp SuQmo' puQbej vajar. SIghbe'meH
SIp, tlhuHDaj polchoH 'ej mInDu' SoQchoHmoH. "SIQ!" jatlh ghogh.
"yaHraj pol! SIp wIchu'Ha'ta'DI' bong wa' wInoplaw'. wItI'lI'!"
tachvo' QaDmoHwI' DIr yIQ ghomHa' vay'. qabDaj QanmeH wa' lo' vajar.
jatlhqa' ghogh, "Qobbe' SIp. vo'wI' neH 'oH. may' SIp wIchu'Ha'ta'."
majQa', chamwI'pu'. raS 'emDaq tortaH vajar. Qeqrupqa'. chuS SIp,
ghaywI'mey veghtaHvIS 'ach voQmoHbe'. pay' lojmIt vegh nagh rurbogh
jan. vo'meH jaDlaw'ta' vay'.
"jorwI'!" jatlh vay'. jorwI'Hey ghoS ghutar, woH 'ej lojmItDaq
jaDqu'. ghutar ghop mejDI' tlhIch tlhuDchoH. DaH voQmoHbogh SIp
larghlaH vajar. SIp tlhuDwI' 'oH jan'e'. pa' HIvchoH 'avwI' ghom
chu'. nISwI' beH qeng 'ej qabDu'chaj QantaH mIvmey, SIp botbogh
janmey'e' je. qabDu'chaj 'angbe'. Hoch lojmItmey vegh 'e' lunID, SIp
tlhuDwI'mey jaDtaHvIS. lojmIt botmeH Dup pIHbe'ba'pu'. vIDbogh
tlhInganpu' chech pIHpu' 'ach mangghom lutu'. lojmItmey veghtaHvIS
negh wa'DIch, HIv 'ej luchchaj jon qIQwI'pu'. lujlI' to' 'e' tlhojDI'
negh, bachchoH, vaj bachchoH je qIQwI'pu', 'ej jorwI'chaj lutlh jaD.
HeghlI'bogh mang bep QoylaH vajar. chuSqu' tIHmey, muD DuQtaHvIS 'ej
tatmey larghlaH vajar. wewchoH raSDaj 'ej tujchoH, qIpDI' nISwI'
tIHmey. vajar pu' tIH ghovpu' vay' 'ej ghaHDaq QeqchoHta'.
bachtaHvIS vajar, Dup--may'vam Dup, qIQwI'pu' Dup, qImyal Dup
je--qeltaH. tetlI'bogh raS DoHchoH 'ach rInchoH may'. bachbe'choHpu'
Hoch. buQbe'choHpu' qImyal qaS. HeDtaH HochHom. Heghpu' 'op.
lojmItDaq Sum QottaH HeghlI'bogh mang. Dung bej. vajarDaq QeqtaH
mInDu'Daj. tlhuH 'e' nID 'ach HughDaj tebmo' 'Iw, ghagh neH. be'
ghaH. mIv tuQbe'taH, 'ach chaq teqpu'. jagh, jup ghap ngu'laHbe'
vajar. ghaytan wo' toy'qang. tlhuHlaHmeH mang DopDaq tlhe'moH vajar.
be' Dub 'elpu' nISwI' tIH 'e' leghlaH. mang ro qoD Qaw'pu'. Heghpa'
wejlogh tlhuH neH. jatlh qIQwI', "bong ghaHDaq bach may' qochDaj
'eltaHvIS. Qu'maj ngeDmoHpu'." Hegh tlhIngan mang 'e' pay' vajar.
chaq 'eb ghajchugh qIQ 'e' maS. 'ach pIpyuS pach DaSop DaneHchugh
pIpyuS puS DaghornIS. lomvo' nuHmey, latlh luch lI' je boS qIQwI'.
---
SKI: The birthday party is now a civil war party.
More information about the Tlhingan-hol
mailing list