[Tlhingan-hol] nuq bop bom: 'ay' cha'vatlh wejmaH loS: SalDI' lojmIt

[Qov]

Angry soldiers charged into qImyal's suite believing she was in there.

CONTENT: Gory violence.

234 SalDI' lojmIt

qImyal lunejtaH beqpu'. betleHmey QachtaH 'ej 
bortaS lumaqqu'taH ghoghmey 'ach Sa''e' 
luSambe'pu'. jatlh vay', «Qongpa'Daq ghaHbe'.»

jatlh latlh, «QongDaq bIngDaq bonejta''a'?»

Hagh latlh. jatlh, «puchDaq yInej.»

chob 'elbe'pu'mo' qImyal 'ej jolpat 
chu'Ha'lu'ta'mo' mejlaHbe'pu'. qIDtaHvIS bortaS 
nejtaHbogh negh, moghchoH je. Dargh 
HIvje'mey[282] ghortaH. qImyal HIq luSam 'ej 
lutlhutlhchoH. jachtaH vajar Duj. mujba' vay'. 
nagh beQmeyvo' bejtaH qun SuvwI'pu'. nuqDaq 
ghaHtaH Sa''e'? nuqDaq So''eghlaHtaH qImyal?

tlhIm 'emDaq lojmIt luSam 'ej poSmoHmeH leQ chu'. 
nom SalDI' lojmIt, pa'vo' nISwI' tIHmey bachchoH 
'avwI'pu'. vaQqu' 'avwI'pu'vam. HoHqu'taH 
nISwI'mey. noDchoH lotlhwI'pu' 'ach tIHmey 'omlaH 
yoD Sutmey tuQtaHbogh 'avwI'pu'. jach 'ej pum 
lotlhwI'pu', HIvwI'pu'chaj qabDu' leghbe'taHvIS. 
Qan'eghmeH vajar, Hew 'emDaq QamchoH. pIm nuch 
qoH je: nuH HutlhtaHvIS vajar, jaghvam Suv 'e' 
nIDchugh, qoH ghaH. luSov je latlhpu'. Hew 'emDaq 
vajar tlhejchoH cha' latlhpu'. Hota'ro' ghaH 
wa''e'. latlh leghDI' vajar, lom 'oH 'e' tlhoj. 
mang nach Dop 'elpu' tIH, So''eghtaHvIS mang. 
jorbe'pu' nach 'ach qab Qaw'lu'chu'pu'.

pa'Daq qub Dochmey Sub. raS 'emDaq So''egh 'e' 
nID wa' mang, 'ach raS Qaw' wa' tIH 'ej mang Qaw' 
tIH cha'DIch. HoSghaj tIHmeyvam. ghutar legh 
vajar. betleHDaj qengtaH. tlhoy'Daq 
'uy'eghtaHvIS, 'avwI'pu' chol. <i>Qapla' 
chavjaj</i>. 'ach HIvbe'lI' ghutar. jatlhchoH, 
«SuvwI'pu'! quv bonejmeH ra'wI'ra' boHub 'ach 
ta'vetlhmo' batlh bochavlaHbe'. qImyal ta'mey 
quvHa' boSov, ghaHvaD bota'pu'mo' tlhIH. 
ghe''orDaq ta'meyvetlh neH boja'laH boneH'a'?» 
yay'moHmo' ghutar qajunpaQ, tamchoH Hoch 'ej 
ghutar ghogh luQoylaHchu'. 'Il ghaH, nong. ghutar 
DaQoychugh, tlhachDaj Damuv DaneHbe'laHbe'. jatlh 
ghutar, «veS quv yIHub! jajvam qun qonlu'DI', 
batlh bowIvta' net qonjaj! batlh--»

bejtaHvIS vajar, muD DuQ wewbogh tIH bachta'bogh 
'avwI'. ghutar nach 'elchu' tIH. jorqu' nach. Dat 
ghutar nach Hom 'ay'mey, QoghIj 'ay'mey je 
lughaylu'. ravDaq Dej nach Hutlhbogh ghutar lom'e'.

wa'vatlh nem Heghvam lut ja'taH ghutar qorDu' 'e' 
Sov vajar. reH Hegh yoHwI'pu''e'.
---
SKI: ghutar makes a speech about honour that will 
be remembered for generations.
---
[282] I thought it would be nice to find out what 
happened to those tu'lumey Mahoun sold her, but 
vajar is a pretty regular guy, and not old enough 
to call them that, so they're just plain old Dargh HIvje'mey for him.