[Tlhingan-hol] mIl'oD veDDIr SuvwI': 7 - Dujeychugh jagh nIv, yItuHQo'

[Rohan Fenwick - QeS 'utlh]

The final 'ay' of 'ay''a' wa'. Having a lot of fun with this!

Warnings: Killing of animals, and some blood.

7. Dujeychugh jagh nIv, yItuHQo'

Hatlh luvegh chaH lIghtaHvIS, chaH tlhopDaq Ha'DIbaHmey tlha'taH chaH lIghtaHvIS. HoHtaH chaH 'ej Qaw'taH chaH, Qunpu' vaqtaH chaH, yotlh yav lunguvmoH 'ej Ha'DIbaH 'Iwmo' luDoqqu'moH chaH. maq 'avtanDIl lubejtaHbogh nuvpu', jatlh: «QI'tu' SuvwI'na' ghaHchu'!»
yotlhvetlh Hoch luvegh chaH 'ej Ha'DIbaHmey tlha'lI'. yotlh Dop HopDaq bIQtIqHom lutu'; bIQtIqHom HeH Sum luvel naghmey; HeH Hop So' ngem[1]. tagha' ngemDaq luHaw' Ha'DIbaH; pa' tlha'laHbe' 'avtanDIl Sargh roStevan Sargh je. toDuj ta'chaj chavta'DI' 'avtanDIl roStevan je, Doy'choHpu', 'ach jeQtaH chaH! jatlhchuq Hoch cha' «jIQapta' jIH'e'!» Quchqu'taH chaH 'ej qIDchuq, 'utlh toy'wI'pu' loStaHvIS. tugh pawpu' paSbogh toy'wI'pu', 'ej cholDI', jatlh 'utlh: «yIvIt; 'etlhmaj tIbochmoHQo'.»
lujatlh toy'wI'pu' «mavItbej, 'o 'utlh; pItojQo' maH. 'avtanDIl'e' Darur SoH 'e' wImaqlaHbe'neS[2]. 'e' wIja'mo' chaq juHoH 'ach teHtaH 'ej nIboQbe' Heghmaj. Ha'DIbaHmey qIpta'bogh ghaH DIleghpu' 'ej DItoghta'; vIHqa'qu' pagh. nItebHa' cha'SanID boHoHta' tlhIH cha', 'ach wa'SanID wa'maH HoHta' 'avtanDIl 'ej Hutvatlh HutmaH neH DaHoHta' SoH. 'ej chonnaQmeyDaj'e'[3], ray'Daj chIlpu' pagh tIH, 'ach yav neH luqIppu'bogh chonnaQmeylIj law''e' DIyIrnISpu'neS.»
'e' QoyDI' 'utlh, QeHbe'qu', SaHbe'law'; tlhoS Quj QapwI' neH maqlu'law'. vItpu' toy'wI'pu'Daj 'e' ra' 'utlh 'ej ruchta'mo' belchu'. loDvam'e' Qorghqu'ta'bogh ghaH, yayDajmo' Quchqu'choH 'utlh. vuvqu' 'ej muSHa'chu' 'utlh. montaHvIS lop, 'ej tIqDaj 'ItHa'choHmoHlu'.
Sormey bIng QIbDaq leSmeH pa' ba' chaH cha', qIDtaHvIS 'ej QuchtaHvIS. chaH retlhDaq ghom wa'maH cha' toy'wI', yoHwI' matlhwI' je; ghIq toy'wI'pu' retlhDaq ghom negh law'qu' 'ej Dech, ngem HeHDaq ngechHommey, bIQtIqHommey je bejtaHvIS.
--------
[1] This descriptive bit's awkward and I may rewrite it to make it flow better. The source text is disjointed here, but I'm not as concerned with remaining super-faithful to the source as I am about spinning a coherent yarn.
[2] Working out how much {-neS} is too much is a really intriguing balancing act.
[3] A comment from Qov made me realise {beHmey} were anachronistic and that this would be a good opportunity to use the rich spear-related vocab from KGT.
--------
SKI: The count from the hunt is in. 'avtanDIl wins.


QeS
 		 	   		  
-------------- next part --------------
An HTML attachment was scrubbed...
URL: <http://stodi.digitalkingdom.org/pipermail/tlhingan-hol/attachments/20120816/012a6b98/attachment.html>