[Tlhingan-hol] Hoghvam qaSpu' (2011-09-24)

[Brent Kesler]

qaSpu' wanI'mey law' 'ach cha' lutHommey neH vIgherta'.

bI'reng

== Heghpu' «tlhobQo' ja'Qo'» ==
Hoghvam jaj cha'DIch, QI' ngoch chu'Ha'ta' 'amerIqa Sepmey boq'a'.
«tlhobQo' ja'Qo'» ponglu'. parmaq SammeH, loD Suqchugh loD, qoj be'
Suqchugh be', peghtaH 'e' poQtaH ngochvam. chaH tu'chugh QI', mejnIS
chaH. ja' ngoch gholpu', qeqqu'ta' negh 'ach QI'vaD yaS po', QaS po'
je HutlhmoH ngoch. Heghpu' ngoch 'e' lop mangpu' law'. ngochmo'
wa'netlh loSSaD mangpu' mejmoHpu' QI'. DaH DImuvqa' DIneH 'op neghvam.

== yemen che'ta' Sale ==
SepDaj che'ta' yemen DevwI'quv 'alIy 'abDula Sale. wejwen DevwI'quv
juH'a' HIvpu' gholpu'Daj 'ej nachDajDaq rIQchoHpu' Sale. rIQHa'meH
ghaH 'ej lunuDmeH Qel, SawDIy 'arabya'Daq nge'lu'ta'. tunISya'Daq,
'IyjIptDaq, libya'Daq je wanI'meymo', qumchaj luqaDmeH, pIltaH
yemennganpu'. qaStaHvIS jav jarmey, qum lumorghmeH, monDaq ghomta'
ghom'a'mey. rut chaH tlhaS mangghom, qum pabwI'pu' je, 'ach Haw'pu'DI'
Sale, rojHom lu'oD 'e' lunID jIl Sepmey. taghDI' Hoghvam,
vaychoHqa'pu' yemennganpu' 'ej Heghpu' wa'vatlh. rojHom chu' ra' Sale.
SughHa''egh ghaH 'ej Hoch rewbe'pu' toy'meH, chenchoH qum chu' neH
'amerIqa boq'a', latlh Sepmey puS je.