[Tlhingan-hol] nuq bop bom: 'ay' javmaH Hut: <qaStaHvIS wa' tup cha' Hugh SIjlaH Qambogh loD>
Qov
robyn at flyingstart.ca
Mon Oct 31 01:14:16 PDT 2011
And here the violence begins, today's features:
exsanguination and disruptor fire.
The sensors were accurate when Hota'ro' reported
them to have detected the presence of raiders.
69
DujDajmo' bey'vo' meqleH tlhap HoD 'ej meH
'elqu', chenchoHtaHvIS Soch chorgh!--wewbogh
tutmey. meHDaq jollI' jagh. nom ngIq tutDaq Qeq
Hota'ro' 'ej bach 'a wej chenchu'pu'mo' nuvpu'
SIghbe' nISwI' tIH. tIH qIlchu' jol 'ej HoS natlh
neH. chaq chuyDaHvaD Hoch Sov DeghwI', 'a logh
may'vaD paQDI'norgh HutlhtaH. HoD retlhDaq
chenlI' cha' nuvpu': nIHDaq SaH wa'DIch 'ej
poSDaq SaH cha'DIch. ghaH nIH volchaH DungDaq
meqleH yan HoD poS ghop. 'uch 'ej qaStaHvIS
lupHom loSlI'. SubchoHqu'DI', 'a
wewbe'choHchu'pa' jagh wa'DIch, poS DeS SIHHa'moH
HoD 'ej meqleH Qachqu'. meHDaq SaHDI' jagh, Hugh
'aD'a'Daj[1] SIjchu' HoD meqleH. yevbe' meqleH
jej. He SaS ghoSlI' 'ej tlhe'laHpa' jagh cha'DIch
HughDaj mup je HoD meqleH. Hugh pe'chu' 'ej
mongDaq pIp mup je. cha' HughDu'vo' ghayqu'[35]
'Iw SuD, DejtaHvIS ghajwI'pu'chaj. may' law'
Suvta' HoD. jolwI' HIvmeH poH ngu'laHchu'. ghol
vebDaq DuvchoHpa' HoD, HeghwI'pu' mut ngu'meH yevbe'.
Qeqchu'taH Hota'ro' 'ej SubchoHpu' DoSDaj
vaghDIch. SIbI' Sangta' tIH.[4] ghutar 'emDaq
jagh Qeq je Hota'ro' 'ach nISwI' HujHa'pu'mo',
rIQ neH. pum 'ej 'oy'mo' jachchoH. nIch! jatlh
Hota'ro' 'ej ghutarvaD HIch nob.
jagh veb ghobchoHtaHvIS HoD ghu' chov 'e' nID.
ratlh loS jagh pIv 'ej wa' rIQwI'. 'oraya'ngan
weHwI'pu' chaH. HoS nuH qengbe'law' 'ach baS
'etlh yan Hoch 'ej Hota'ro'Daq naQjej chuHlI'
wa'. junlaw' Hota'ro'. nuH lu'uchlaH ghutar ghop
'e' Sovbe' HoD 'a Hay'choHmo' 'ollaHbe'. HoD
mongDaq betleH rurbogh 'etlh'e' jop weHwI'. way'
HoD. vaHDajDaq pu'HIch tu'lu' 'ach poSDaq HuStaH.
chaQDI' jagh DoH HoD. pu'HIch lelmeH poS ghop
lo'nIS. 'etlh lev jagh, DuvtaHvIS 'ej Qach.
way'meH meqleH lo'qa' HoD. mupchuqDI' 'etlhmey,
loQ 'oy' ghop, yeb, DeS, DeSqIv, volchaH je.
pu'HIch SIchmeH nIH ghopDaq meqleH baQchugh, way'
'e' SIQlaHbe' nIH DeS rIQ. wa' ghop lo'laHbogh
vaj'e' Suv, wej 'e' tu'law' jagh.
---
SKI: Blades, battle and blood.
---
[1] Yeah, I know that seems to be an artery. Maybe Maltz is bad at biology.
[4] Even though in Star Trek terms it's a cleaner
obliteration, from this verb's homophone in
French I always imagine the enemy exploding into a mist of blood.
[35] This used to be vo''eghqu'. vivent les nouveaux mots!
More information about the Tlhingan-hol
mailing list