[Tlhingan-hol] nuq bop bom: 'ay' vaghmaH wej: <malja' bel ghap>

[Qov]

nuq bop bom, also available at http://nuqbobbom.blogspot.com continues.

Recap: In a move one reader called "Chekhov jol" Mahoun asks the head 
of security to beam him down to a meeting with the Klingon emissary.
---
53

malja' bel ghap

rep wa'maH cha' vaghmaH Qol Mahoun, malja' Sut tuQtaHvIS[41]. vengDaq 
narghDI' SIbI' Qe' ghov. qach tlhopDaq meQ qul 'ej qul DungDaq QIt 
DIng Suy' naQ DuQchu'bogh naQ. tlhe'taHvIS naQ, chaghDI' tlhagh, pan 
qul. bolmoH pIw. reD Hutlh Qe'. lam 'oH rav'e' 'ej tun beb 'ach 
Say'law' quS raS je 'ej He' Soj Dun. Suy' vutwI' juStaHvIS Mahoun 
van. Qe' 'el. wej SaH 'eSSIm. SIbI' chol jabwI'. DIvI' Hol jatlhchoH 
jabwI'. yaj Mahoun. Mahoun DevtaHvIS raS lughoS 'ej HIDjolev nob.

paw 'eSSIm. Quchlaw'. tlhIngan yopwaH, Sung yIvbeH, tlhIngan Ha'quj 
je tuQtaH. tIS yIvbeH 'ej HuSmo' mongDech ngech 'ang. Mahoun leghDI' 
raS ghoS 'ej SIbI' ba'choH. jatlh "nuqneH."

tlhInganvaD rI'meH mu' 'oHbe' 'e' Sov Mahoun. malja' HuqmeH tlhIngan 
Duy rI'ta' Mahoun Duj vaj DaH Sutlhrup. be' mInDu' neH bej Mahoun 'ej 
jatlh "wa' vI' vagh 'uy' cheb'a' Sung tIr vIje' vIneH." ghelbe'. 
qaDbe'. malja' ja' neH. jang 'e' loStaHvIS HIDjolev woH, 'ach 
HIDjolev buSbejbe'. be' bejtaH.

jangrupbe'law'. "qatlh?" jatlh.

SIbI' jang Mahoun. jatlh "Suy jIH. Dochmey vIngevmeH vIje'." HIDjolev 
laDchoH. Sung Hol, DIvI' Hol je lo' 'ach DIvI' Soj mu' Sovchu'be'mo' 
Mahoun, Qatlh Qu'. HIDjolev roQ.

"tIr law' 'oS wa' vI' vagh 'uy' cheb'a'mey" jatlh 'eSSIm.

"wa' vI' vagh 'uy' cheb'a' ngI'bogh tIr 'oS" jatlh Mahoun. "qatlh 
to'waQ DayIvtaH?" tIqIpqu' 'ej nom tIqIp.

"qatlh wa'Hu' cha'logh chotlhob?" jatlh 'eSSIm. nuqjatlh? tIr 
qelbe'choH be'. mISmoH neHlaw'. Qapbe' Dupvetlh. SIbI' jang Mahoun.

"wa'Hu' qangagh vIneH. DaHjaj tIr vIje' vIneH. reH cha'logh 
qatlhobnIS'a'?" jatlh Mahoun. boH ghoghDaj 'ach ghu' tIvqu'taH. 
tlhIngan quv qaDpu' 'e' Sov.

jangpa' chol jabwI'. ghaHvaD Sung Hol jatlh 'eSSIm. jatlhpu'DI', 
Mahoun bejchoH jabwI'. Suy' 'aghmeH Mahoun, tay'taHvIS SIqwI' qaywI' 
je joqmoH. vay' ghelDI' jabwI' jang 'eSSIm 'ej mej jabwI'. tIr qelmeH 
wej jangta'mo' 'eSSIm, loS Mahoun.

tagha' jang. jatlh "naDev tlhIngan Hol jatlh pagh 'ach muvuv. DaH 
burghlIjDaq ghonDoqwIj vIDuQchugh 'ej woSlIj SIchmeH 'etlh pe'vIl 
vIpep, nIS pagh. meghwIj lujabmeH lomlIj lujun neH. jejqu' 
ghonDoqwIj. vIruchchugh ghaytan yavvo' Salbe' qamDu'lIj." buQbe' 
ghogh 'ach buQqu'taHvIS mu'mey, ram ghogh.
----
SKI: Mahoun meets Eshim in a restaurant and they discuss the local 
availability of grain. (What, you were expecting something else?)
----
[41] I have no idea whether a yelwIyyItngan malja' Sut includes a 
flowing robe or a spiked helmet. But whatever it is, Mahoun has it 
on. Cause he's doing business!
-------------- next part --------------
An HTML attachment was scrubbed...
URL: <http://stodi.digitalkingdom.org/pipermail/tlhingan-hol/attachments/20111014/59e51821/attachment.html>