[Tlhingan-hol] nuq bop bom: 'ay' loSmaH loS

[Qov]

Recap: ghutar was describing clinging onto a malfunctioning thruster 
on the outside of the ship.

44

"vIj vI'uchtaHvIS, naw'meH lojmItHom vIpoSmoHmeH tajwIj vIlo'. 'ach 
vIlISmeH taj vIlo'be'nIS jatlh Hota'ro'. nItlh vIlo' 'e' vInID 'a 
Soy'qu'mo' poghmeywIj naw'meH lojmItHom veghbe'. chuch 'ay' jej vIlo' 
'e' vInID 'a Qapbe'. ghurtaH tajvaj. nItlh lo'nISlu' jatlh Hota'ro' 
vaj nItlh'e' vIlo'bejmeH SutwIj tlhay vIpe'." jatlh ghutar.

yay' HoD. jatlh "logh SutlIj'e' Dape''a' jay'. loghDaq Dape'DI' nuq DapIH?"

"HoD," jatlh ghutar. taHpa' ba'choHmeH chob'a' tlhoy' lo'. "HoD, 
jIQupqu'. wa' Duj neH vIchIjpu'. wIgh jIHbe'. 'ach jIQIpbe'. loghDaq 
logh Sut pe'lu'chugh nIj yInSIp 'ej Hegh SuvwI'. vIj Heghbat vIbotmeH 
jIvangnISpu'. tlhay vIpe' ghIq ghopwIj vIlel. SIbI' nIjbe'meH Hoch 
yInSIp, jIvumtaHvIS yeb vI'uch."

"'a qatlh latlh tlhay Dape' je?" jatlh HoD.

"Qatlh vIj tI'meH Qu'. vIta'laHpa' bIrchoHpu'mo' ghopwIj 
vIlo'laHbe'taH. Qap ghop cha'DIch. SIbI' mI' 'e' mev vIj. SutwIjDaq 
ghopDu'wIj vIlanqa' 'ach nIjtaH muDwIj. tujqu'mo' vIj, tet chuch. 
chen bIQtIqmey. tlhaymeywIj vIngaQqa'moHmeH bIQtIqvetlhDaq DeSDu'wIj 
vIlan. Qap 'e' vISovbejbe' 'ach latlh nuH vIghajbe'. Qapbe'lI' 'e' 
vIHar. jIpujchoHmo' 'ej jIQubbe'choHmo'. tuSammeH Som vIpup, 'ach 
ghaytan boQoybe'. jIpujchoHpu'. jIvulchoHlaw' 'a naDev jIH."

ngugh choHbe' chob'a' ba'taHbogh ghutar'e' 'ach 'IjtaHvIS HoD, 
choHlaw'. qeqmeH Qu' ta'Ha'laHbogh ne''e' leghbe'choH vajar. DaH 
chob'a'Daq ba'taH Duj toy'bogh SuvwI''e'. HoD DuQqu' ghutar ta'. 
Qumbe'choHpu'DI' HoD lImbe'pu'. loSbe'pu'. ghu' tu'pu' 'ej Qu' nabpu' 
'ej ta'pu'. SomDaq, baHtaHvIS vIj lISta'. Qu' DuHHa' lajpu' 'ej 
Qapta'. vangbe'pu' ghutar Hegh Hoch.

"tujqu' vIj, baHtaHvIS. chay' DameQ'eghmoHbe'?" jatlh HoD.

ghutar ghopDu' bejchoH ghutar. "jImeQ'eghqu'pu'. qaStaHvIS wanI', 
ghopDu' vImeQmoHchu' 'e' vIHar. 'a ratlhlaw' Hoch nItlhDu'." bellaw' 
ghutar. "choqlaw'pu' chuch. 'a Do'Ha' HoS choHwI' vIchIllaw'pu'." jatlh

ghutar bejqa' HoD. DujDajvaD Heghqang SuvwI' net pIH. 'ach DujDajvaD 
Qotlh'eghqangDI' vay', toy'chu'.

"jIHeghvIpbe'pu'." jatlh ghutar. "Qu' vIlajta'. Qu'Daj ta'taHvIS Hegh 
'e' tul Hoch tlhIngan."

"bIHeghvIpbe' 'e' vISov. HonlaH pagh."

"jIHeghvIpbe' 'ach jIHegh 'e' vIpIHbe'," jatlh ghutar. "Duj law' 
DachIjpu'. Qap HoDwI' 'e' vIvoqtaH." HoD ghIch bochmoHbe'law' ghutar. 
tlhIngan qa' pIlmoHta' Qob.
---
SKI: ghutar both burned and froze his hands to save the ship, then 
further froze them to save his life.
---
ghunchu'wI', Daloyta' 'e' vISov. tlhoy ngeD'a' loymeH Qu'? Dal 
vIneHbe', 'a vImISmoHchu' vIneHbe' je.