[Tlhingan-hol] muchmey Dun, lutmey Dun

[ghunchu'wI' 'utlh]

wa' ben «ram nI' lop bom» much vItIv. vIparHa'mo' vIbejqa' vIneH.

qorDu'wIj tlhej latlh 'e' vIchup. qech laj Qov. Qap jey wInabbogh.
cha'Hu' SaqDI' muD Duj lIghbogh wIghom jIH puqloDwI' 'ej juHmajDaq
wIlup. machqu' Qov tep. lengwI' po' ghaH. juHDaq mapawpa' nutlhej
be'nalwI' 'ej wovmoHwI'mey law' DIleghmeH maghoSchoH. ghIq juH
wIghoSqa' 'ej tlhIq wI'ep.

po mavem 'ej barghchab beQ vIvut. wa' chab vIyoymoHmeH bargh vIjImmoH
'ej vIpuvmoH. Qapla'! barghDaq Saqchu' chab yoy. nIQvaD nuSuch SoSwI'.
matay'taHvIS maSop 'e' wIlop.

Huv chal 'ej wov jul wa'Hu' 'e' maq muD noHwI'. DaHjaj peD. mujba'pu' maqwI'.

veng tu'HomI'raHmey legh Qov 'e' vIraD. ben law'qu' Sor tInqu'
pe'lu'pu', 'ej ratlh 'uj'a' 'aDbogh 'ay'. bey qachDaq 'ay'vam 'anglu'.
tangqa' tInqu' 'anglu' je. qachDaq qach velqa' mach 'anglu'; Do'Ha'
velqa'Daq qachHom machqu' wIleghbe'. qach retlhDaq tal ngo' wIlegh.
noHvaD talvam DIlta' veng yej'an. ghIq "Kokomo ta'Hom" van'a' wISuch.

majaw. lutmey law' DItIv.

tunchoHpu'mo' puH Duj rutlhmey, bIHDaq SIp vIchel. Chicago-Daq
wIlengpa' megh wISopnIS tlhoS 'e' vIlIj. nom naHmey, tIr gho je DISop.
ghIq Hoqmaj wItagh. qetlh leng 'ach Daj ja'chuqghachmaj. qaStaHvIS wej
rep maghoS.

ghochmaj wISIchpa' numevmoHchu' Hutvagh. maghoSqa'laHbe'chugh,
mapaSchoH 'ej nargh 'uQ 'eb. He''a' vItlheD 'ej Hemey motlhDaq
jIchIjchoH. pItSa chab Qe'Daq raQpo'pu'wI' vItenHa'moH 'ej verghqach
Sum vISam. much vaS Daq vI'ol 'ej Qe'Daq jIcheghmeH jIyIt. latlhpu'
vImuvqa'DI' Soj luwIvta' 'ej lupoQta' 'ej luDIlta'. loQ maloS.
paSchoHmo' rep raSDaq maba'meH poH wIHutlh. Sojmaj nobDI' tebwI' much
vaSDaq mayItchoH. mayIttaHvIS pItSa chab wISop. ('ey'qu' 'e' vIQub
jIH. Qov QuchmoHbe'law'.)

much wIbej. Dun. DaHjaj latlh vIjatlhbe'.

ghIq juHDaq wIchegh. qaStaHvIS wej rep maghoS. mapawDI' cha'logh
Qoylu'pu'. maQong.

Sunday maleS. lengbogh juHHom vI'agh. megh vIqaw 'ej ray' tIr chatlh
wI'ep. Qov lengvaD cha' tera' na'ranHom vInob. muD Duj tIjmeH ghaH
wIlupqa' jIH be'nalwI'. maghoStaHvIS majawqa'. chaq tlhoy 'eq pawDI'
'ach vaj mejpu'be'bej Duj.

Such mebma' rIntaH.

jIghItlh 'e' vImevbe'chugh, QIn tIn laDqang pagh.
jabbI'ID pItlh

-- ghunchu'wI'