[Tlhingan-hol] nuq bop bom: 'ay' wa'vatlh: <qama' Soj>
Qov
robyn at flyingstart.ca
Fri Dec 9 08:44:58 PST 2011
Yep, one hundred. Not halfway through yet. I hope I'm 1/3 of the way through.
Mahoun recounts hearing a choking prisoner in a Klingon brig.
100
jatlhlI' Mahouh. "tugh 'elqa' be' 'ej 'el je latlh tlhIngan yaSpu'.
'avwI'vaD jach be'. be'vaD jach yaS nIv. ra' yaS nIv ghIq nujwIj
mInDu'wIj DeSDu'wIj je tlhabmoH 'avwI' 'ej jIH tlhopDaq yaS wa'DIch
porgh luH chaH. vItoD 'e' vInID. DopDajDaq vItlhe'. voQlaw'pu'mo' nuj
vInuD. SaH Soj. Soj vIlelmoHmeH nuj vISen 'ej DubDaq vIqIp. HIja',
'eSSIm ghu' rurqu'. roDaq vIyuvqu'. tagha' nujvo' chagh Soj yIQ.
nujDaq vInuDqa'. loj Soj, 'a tlhuHchoHbe'. Qapbe'law' je tIq. ghaHvaD
jItlhuHchoH 'ej roDaq vIqIptaH. ghaytan joQDu' vIghor. tIq vIQapmoH
vIneH 'a jIluj. Heghpu'mo' loQ jIbel. HeghmeH qoy' 'e' vIQoy.
Heghpu'mo' lujoy'laHbe'taH. 'ach vItoDlaHbe'mo' jI'IQ.
"qama' nuDmeH chol yaS nIv. bong HIvje' pup ghaH 'ej ravDaq bIQ lIch.
vIroSmeH chorwIjDaq jIQotchoH. ngugh bIQvetlh potlh law' yaS wa'DIch
Hegh potlh puS. ghIq Soj yIQ vISop. HIja' HeghwI'Hey Hugh Soj vIlel
ghIq vISop." tuHmo' HoD jatlh 'e' mev.
qabDaj So'meH ghopDu' lo' QeDpIn. 'IQlaw' HungpIn. jatlh QeDpIn
"Mahoun, jI'emrup. voQtaHvIS qama' boQbe' 'avwI' 'ej Dujoy'meH DatoD
'e' ra'. chaq porghlIj lujoy'be'pu' 'ach yablIj lujoy'bejta'. bIrop
jIjatlh vIneHbe' 'a DuQaHnIS vay'. nIqawmoH wa'Hu' wanI'mey 'e' vIyaj
'ach qatlh juja'lI'?"
yaSpu'Daj mInDu' bejtaH neHbe'mo' Mahoun De'wI'Hom chu' 'ej ruQtaHvIS
jatlhtaH, "lugh 'eSSIm, Mossam je. tlhoy QaQ laHwIj. chay' tlhIngan
Hol vIjatlhlaHchu'? qaStaHvIS loS jar 'anDorngan DujDaq jIleng 'ej
'anDor Hol vIjatlhtaHvIS muvaqtaH 'anDorngan. qaStaHvIS wej DIS DIvI'
Hol vIHaD 'ej pIj malja' HuqmeH DIvI' Hol vI'lo' 'ach povbe'taH.
chay' puplaH tlhIngan HolwIj?"
mIS QeDpIn. "rar'a' wanI'meyvam? voQmo' qama' tlhIngan Hol
DajatlhlaH'a'? Mahoun, choghIjchoH."
jatlh Mahoun, "jIghIj'eghchoH. ghoqwI' jIH'a'? chaq chaHvaD jIghoqmeH
yabwIj lughun tlhIngan pagh QoghIjwIjDaq jan lujom. 'oHmo' tlhIngan
Hol vIjatlhlaHchu' 'ej tlhIngan be' vISaHchoH. rut jInajtaHvIS
tlhIngan vImoj." jatlhtaHvIS De'wI' ghItlhwI' vIHmoHtaH.
----
SKI: Mahoun segues from a seemingly irrelevant story to speculation
about language, while fidgeting with a palmtop computer stylus.
More information about the Tlhingan-hol
mailing list